Idman.biz
Türkiyə Superliqasının 20-ci turunda "Qalatasaray" doğma meydanda "Kayserispor"la qarşılaşıb və oyunu 4:0 hesablı qələbə ilə başa vurub.
İdman.Biz xəbər verir ki, hesab yeddinci dəqiqədə açılıb. Yunus Akgünün sağ cinahdan ötürməsindən sonra Opoku topu öz qapısına göndərib. 26-cı dəqiqədə Viktor Osimhen penaltini dəqiq yerinə yetirərək fərqi artırıb. İkinci hissədə üstünlüyünü davam etdirən meydan sahibləri 60-cı dəqiqədə Qabriel Saranın qolu ilə hesabı 3:0-a çatdırıblar. Matçda son nöqtəni isə əlavə olunmuş dəqiqələrdə penaltidən Mauro İkardi qoyub.
"Kayserispor"un Kardoso ilə vurduğu qol VAR baxışından sonra ofsayd səbəbindən qeydə alınmayıb.
Bu nəticə ilə "Qalatasaray" xalını 49-a yüksəldərək turnir cədvəlində liderliyini qoruyub. "Kayserispor" isə 15 xalla 17-ci pillədə qalıb.
Növbəti turda "Qalatasaray" səfərdə "Çaykur Rizespor"la, "Kayserispor" isə evdə "Kocaelispor"la qarşılaşacaq.
20:47
Türkiyə Super Liqasının 20-ci turunda "Gənclərbirliyi" doğma meydanda "Qaziantep" ilə qarşılaşıb. Ankara təmsilçisi görüşü 2:1 hesabı ilə qalib başa vurub.
İdman.Biz xəbər verir ki, matçda hesab 10-cu dəqiqədə Talissonun qolu ilə açılıb. 63-cü dəqiqədə Məhəmməd Bayo "Qaziantep"in bərabərlik qolunu vurub. Oyunun taleyini isə 77-ci dəqiqədə Metehan Mimaroglu həll edib.
Bu nəticə ilə "Gənclərbirliyi" ev oyunlarında məğlubiyyətsiz seriyanı beş matça çatdırıb – dörd qələbə və bir heç-heçə. "Qaziantep" isə liqada ardıcıl yeddi oyundur qalib gələ bilmir.
Qələbədən sonra "Gənclərbirliyi"nin xalı 22-yə yüksəlib və 11-ci pilləyə qalxıb. "Qaziantep" isə 25 xalla səkkizincidir.
Növbəti turda "Gənclərbirliyi" səfərdə "Fənərbağça" ilə üz-üzə gələcək. "Qaziantep" isə doğma meydanda "Kasımpaşa"nı qəbul edəcək.
