Siyasət Əsgərov: “Macarları məğlub edib pley-offa getməklə daha bir tarix yazmaq istəyirik”

"İlk dəfədi yığmamız B səbətində yer almaqla Avropa çempionatının seçmə mərhələsində iştirak edir. Olduqca güclü qrupdayıq". Bu sözləri Sport24.az-a açıqlamasında qadınlardan ibarət yığmamızın baş məşqçisi Siyasət Əsgərov deyib.

Mütəxəssis komandasının qrupdakı son 4 oyununu dəyərləndirib: "Qrupdakı rəqiblərimizdən İsveçrə ilə Macarıstan seçmələrini xüsususi fərqləndirərdim. İsveçrə yığması uzun illər A səbətində çıxış edib. Yalnız son Millətlər Liqasındakı çıxışlarından sonra B səbətinə düşüblər. Macarlar isə B səbətində çıxış edən milli olsa da, son seçmə mərhələdə A səbətində Belçika seçməsiylə pley-off oynayıb məğlub olduqdan sonra yenidən B səbətinə qayıdıb. Sözüm odu ki, hər iki rəqibimiz olduqca gücülüdülər. Türkiyə seçməsi isə bizim kimi öz səbətində qalib olduqdan sonra B-yə yüksəlib. İlk oyunumuzu səfərdə Macarıstana qarşı keçirdik. Güclü rəqiblə qarşıdurmada hesabda geri düşsək də, xarakter göstərib bərabərlik qolunu vurduq. Həmin oyunda çox güc sərf etdik. Həm buna, həm də Bakıya qayıtmaq üçün uzaq məsafə qət etdiyimizdən bərpa prossesi keçə bilmədik. Nəticədə doğma publika önündə İsveçrəyə məğlub olduq. Daha sonra Türkiyə ilə Ərzincanda qarşılaşdıq. Həmin vaxt möhtəşəm azarkeş dəstəyi və dolu tribunalar önündə oynayırdıq. Oyuna 10500 azarkş toplaşmışdı. Həmin matçda hakim qərəzli qərarlarıyla diqqət çəkdi. Bizim yüz faizli penaltimizi göz yumduğu halda, rəqibin xeyrinə olmayan 11 metrlik cərimə zərbəsi təyin etdi. Təbii ki, məğlubiyyətimizi heç də sırf hakimin üzərinə atmıram. Özümüz də zəif çıxış etdik. Bu məğlubiyyətdən sonra Bakıda revanş aldıq. Həqiqətən də qızlar evdə daha əzmkar, fədakar oyunla türkləri məğlub etməyi bacardılar".

Siyasət bəy pley-off şanslarını itirmədiklərini də vurğulayıb: "Hazırda 4 xalımız var. Üzüldüyümüz məqam odur ki, İsveçrə - Macarıstan qarşılaşmasında birincilərin qələbə qazanmağını gözləyirdik. Lakin əksi baş verdi. Bu gözləmədiyimiz nəticə oldu. Macarların məğlubiyyəti bizim qrupdakı vəziyyətimizi yaxşılaşdıra bilərdi. İrəli baxmalıyıq. İyulun 12-də bizi doğma meydanda macarlarla ağır və olduqca vacib oyun gözləyir. Qrupdan çıxmaq üçün qələbə qazanmalıyıq. Macarları məğlub edib pley-offa getməklə daha bir tarix yazmaq istəyirik. Odur ki, meydanda maksimum gücümüzü qoyacağıq".

ABDULLA İSMAYILOĞLU