Sport24.az
Misli Premyer Liqasının XXXI turunda keçirilən "Qarabağ" – "Neftçi" (3:0) matçından sonra qonaq komandanın baş məşqçisi Samir Abasov mətbuat konfransında iştirak etdi. Sport24.az xəbər verir ki, mütəxəssis jurnalistlərin suallarını cavablandırdı:
– Niyə məğlub olduz? Niyə qol vura bilmədiz?
– Qol vurmaq üçün imkanlarımız oldu. Əfsuslar olsun ki, qapının içindən belə vura bilərdik. Bu, qalib gələ və ya bərabərə qala bilərdik anlamına gəlməsin. Niyə qol buraxdıq əsas sualdır. Həddindən artıq çox rotasiyalara əl atmışdıq. Zədə problemi mən bura gələndən komandadan əl çəkmir. Bir də fərdi oyunçu səhvləri bu mövsüm başımızın bəlası olub.
– 4 ildir ki, "Qarabağ"a qalib gələ bilməyən "Neftçi" var…
– Bu, Azərbaycan derbisidir və başadüşüləndir. Fərqi yoxdur, heyətdə zədəlilər var və ya kubok oyunu var. Bu, derbidir və qalib gəlməlisən.
– Murad Məmmədovu çoxdandır oynatmırsız. Ümumiyyətlə silmisiz?
– Murad ard-arda oynadığı pis oyunlardan sonra özünə gələ bilmir. Bu, həm məşqlərdə seçilir. Muradı ümumiyyətlə silmək fikrimiz yoxdur. Aleksi Muradla dəyişdik. O, güvəndiyimiz futbolçudur. Bəzi bariyer var ki, özü aşmalıdır.
– "Zirə", "Araz-Naxçıvan", "Turan Tovuz" "Qarabağ"ı məğlub edib amma "Neftçi" yox. Bu komanda avrokuboklara getməyə layiqdir?
– Buradakı məntiqi anlamıram. 4 oyunu mənim üzərimə yıxmayın. 3-də mən olmuşam. "Neftçi Arena"dakı oyunumuz çox yaxşı alınmışdı. Bəli, səhvlərimiz çoxdur. Amma bu, avrokuboklara getməyə layiq deyilik anlamına gəlmir. "Qarabağ" yaxşı klubdur. Əgər elədirsə, onda "Kəpəz" niyə avrokuboklara getməsin? Hər il yenilənən "Neftçi" var. İnşallah ki, bu tendensiyaya son verərik.
– Rafael Quzzonun zədəsi ciddidir?
– Başqa zədə idi. Ciddiyə oxşamır. Dizində toqquşma oldu.
– "Sabah"la cavab matçına Edvin Kuç yetişə biləcək?
– İnanırıq. Həkimlərlə danışıqlarımız olur. Yeni zədədən çıxmış futbolçularımız var. Emin, Darbo, Sek və s. Onları müntəzəm vaxt oynatmaq lazımdır ki, özlərini bərpa etsinlər. Sadəcə bu problemlər aradan qalxmır. Səbəblər özümüzə müəyyən deyil. Üç mərkəz müdafiəçimiz olmasına baxmayaraq biri ilə 3 oyun ard-arda oynamışıq. İnşallah ki, kubok oyununa nəfslər bizdən çəkilər.
– Sambonu oyuna buraxmamağınızın səbəbi nədir?
– Darbo 2 aya yaxın idi ki, zədəli idi. Darbonu oyunu hiss etməsi məqsədiylə meydana buraxdıq. Onu da hansısa dəqiqədə Sambu ilə əvəzləməyi nəzərdə tuturduq. Sadəcə Rəhmanla Quzzonu 90 dəqiqə meydanda saxlamaq istəyirdik. Onlar da əvəzlənmək istədikləri üçün planlarımız pozuldu.
