Sport24.az
"Karvan"da vəziyyət əla idi. Rəhbərliklə münasibətimiz də yaxşı idi. Optimal formada idim. Sadəcə, XVI turda "İmişli" ilə oyunda diz bağlarımda problemlər yarandı. Sonradankı zədəm daha da şiddətləndi. Məhz bu səbəbə görə növbəti oyunlarda şans qazanmadım". Bu sözləri Sport24.az-a açıqlamasında "Karvan"ın qolkiperi Şahin Zəkiyev deyib.
"Çərçivə qoruyucusu" bölgə təmsilçisindən ayrılması icarə müqaviləsinin bitməsiylə əlaqələndirib: "Müqavilə ilə "Araz-Naxçıvan"a məxsusam. "Karvan"da icarə əsasında çıxış edirdim. Naxçıvan klubunun qapı xətdində güclü rəqabət var idi. Mən də oyun təcrübəsindən əziyyət çəkirdim. Ona görə klub rəhbərliyindən daim oynamağım üçün icarə göndərilməsini xahiş etdim. Mövsümün startına az qalmış I Liqanın 5 təmsilçisindən təklif aldım və sonda "Karvan" üzərində dayandım. İcarə müddətim bitdiyinə görə klubdan ayrıldım".
Şahin Zəkiyev gələcək karyerasını harda davam etdirəcəyini bilmir: "Araz-Naxçıvan"la müqaviləm mayda bitir. Muxtar Respublika təmsilçisindən sözləşmənin yenilənməsi və ya yenilənməməsiylə bağlı xəbər gəlməyib. Yəgin, çempionat başa çatandan sonra onlardan xəbər çıxacaq. Gələcək karyeramı harda davam etdirəcəyimi bilmirəm. Menecerlərim xarici klublarla danışıb. Hansı ölkə olduqlarını deməyəcəm, amma aşağı liqa təmsilçiləridi. "Araz-Naxıçıvan"dan alacağım cavabdan çox şey asılıdı. Onlarla sözləşməm yenilənməsə, həmin klublarla danışıqlara başlayacam".
ABDULLA İSMAYILOĞLU
