Sport24.az
Portuqaliya millisinin baş məşqçisi Roberto Martines dünya çempionatları tarixinə düşüb. 52 yaşlı mütəxəssis mundiallarda ən çox qələbə qazanan ispan baş məşqçi ünvanına sahib çıxıb. Sport24.az xəbər verir ki, Portuqaliya yığmasının Özbəkistan üzərində qazandığı 5:0 hesablı darmadağın Martinesin dünya çempionatlarındakı 8-ci qələbəsi olub. Bununla da təcrübəli mütəxəssis İspaniya millisinin sabiq baş məşqçisi Visente del Boskeni geridə qoyaraq yeni rekorda imza atıb.
İspaniyalı çalışdırıcı tarixi rekordla bağlı təəssüratlarını bölüşərək bunları deyib:
"Belə statistikaları görəndə geriyə baxıram və bu, həqiqətən çox gözəl hissdir. Bununla qürur duyuram, çünki bu uğuru qazanmaq asan deyil. Daim uyğunlaşmalı və yeniliklərə açıq olmalısan. Qarşıda bizi çox mürəkkəb dünya çempionatı gözləyir."
Martines dünya çempionatlarında iştirak sayına görə də ispan məşqçilər arasında vahid liderdir. Karyerasında üçüncü mundialını keçirən mütəxəssis bu göstəricidə Xavyer Klemente və Visente del Boskeni qabaqlayıb.
Martines daha əvvəl DÇ-2018 və DÇ-2022-də Belçika millisini çalışdırıb. İspan mütəxəssis dünya çempionatlarında keçirdiyi 12 oyunda 8 qələbə, 2 heç-heçə və 2 məğlubiyyət əldə edib.
2023-cü ilin yanvarından Portuqaliya millisinin baş məşqçisi olan Martines komandanın sükanı arxasında keçirdiyi 40 matçda 28 qələbə qazanıb, 7 heç-heçə edib və 5 dəfə məğlub olub.
Xatırladaq ki, Roberto Martines Portuqaliya millisi ilə UEFA Millətlər Liqasının baş mükafatını da qazanmağı bacarıb.
