Sport24.az
"Bu il bizim üçün düşərli oldu. Həm sərgilədiyimiz oyun üslubuna, həm vurduğumuz qollara, həm futbolçuların inkişafına, həm də çempionluq uğrunda apardığımız mübarizəyə görə layiq olduğumuz çempionluğu qazandıq". Bu sözləri Sport24.az-a açıqlamasında "Neftçi-2"nin baş məşqçisi Rəşad Abdullayev deyib.
Veteran futbolçu bu mövsüm əsas komandaya cəlb olunan oyunçular haqqında da danışıb: "Nəticə, çempionluq öz yerində. Amma həmişə çalışmışıq ki, əsas komandaya futbolçu yetişdirək. Bizi sevindirən məqam odur ki, bu mövsüm bir neçə oyunçumuz əsas komandaya cəlb olundu. Onların arasında qapıçı Rza Cəfərov "Neftçi"nin əsas qolkiperinə çevrildi. Əvəzedicilərdə bombardirimiz olan futbolçumuz da məşqçilərin diqqətini cəlb edib əsas komandaya qoşuldu və özünü yaxşı tərəfdən göstərdi. Fikrimcə, gələn il də bir neçə gənc oyunçumuz əsas heyətdə debüt edəcək. Yeni baş məşqçinin gəlişini gözləyirik. "Ağ-qaralar"ın "sükanı arxasında" kimin olacağı dəqiqləşəndən sonra bu mövsüm özünü yaxşə tərəfdən göstərən oyunçuları ona təqdim edəcəm".
Qeyd edək ki, "Neftçi-2" geridə qalan mövsümdə Əvəzedcililər Liqasında çempionluğu bayram edib.
ABDULLA İSMAYILOĞLU
