Idman.biz
Yarımmüdafiəçi Rahim Sterlinq "Çelsi" ilə müqaviləsini ləğv etdikdən sonra sosial mediada mesaj paylaşıb.
İdman.Biz xəbər verir ki, klub bu gün 31 yaşlı futbolçunun müqaviləsinin qarşılıqlı razılıq əsasında ləğv edildiyini təsdiqləyib. Sterlinq bu mövsüm əsas komandadan ayrı məşq edərək bir oyun belə keçirməyib.
"Gələcəyə diqqət yetirin. Tanrı böyükdür" - oyunçu paylaşımında bildirib.
Jurnalist Fabris Hokinsin X sosial media platformasında verdiyi məlumata görə, Rahim Sterlinq "Napoli"nin marağına səbəb olub. "Napoli" klubu artıq futbolçunun nümayəndələri ilə əlaqə saxlayıb, lakin digər klublar da onu transfer etməkdə maraqlıdır.
Sterlinq 2022-ci ilin yayında "Çelsi" ilə müqavilə imzalayıb. Keçən mövsüm o, icarə əsasında "Arsenal"da oynayıb. "Çelsi" daha əvvəl rəsmi saytında yarımmüdafiəçinin müqaviləsinin ləğv olunduğunu açıqlayıb.
Onun London klubu ilə müqaviləsi 2027-ci ilin iyun ayına qədərdir. "Çelsi"də olduğu müddətdə Rahim Sterlinq 81 oyunda meydana çıxıb, 19 qol vurub və 15 məhsuldar ötürmə edib. "Transfermarkt" oyunçunu 5 milyon avro dəyərində qiymətləndirir.
