İdman.biz
Polşa mətbuatı növbəti dəfə azərbaycanlı futbolçu Rahil Məmmədovun çıxışını dəyərləndirib.
İdman.biz xəbər verir ki, həmyerlimiz Ekstraklasada oynamağa layiq görülüb.
Polşa çempionatının güclülər liqasını tərk edən LKS, "Rux" və "Varta"nın futbolçularının çıxışına qiymət verilib. Lodz klubu ən çox qol buraxmasına baxmayaraq, Rahil müdafiədəki oyunu ilə müsbət rəy yaradıb: "Ən çox qol buraxan komandanın müdafiəçisini bu siyahıya daxil etmək bir az risklidir. Lakin Rahilin bir çox oyunlarda LKS-i xilas etdiyini unutmaq olmaz. O, rəqibin təzyiqi zamanı müdafiədə soyuqqanlı davranır və dəqiq ötürmələr etmək bacarığına malikdir. Məmmədovun daha dinamik olması bir arxa xətt oyunçusu üçün ən vacib amillərdən biridir".
Azərbaycan yığmasının futbolçusunun bəzən müdafiədə risklər aldığı və ciddi səhvlərə yol verdiyi də bildirilib. 28 yaşlı müdafiəçinin Ekstraklasada turnir cədvəlinin orta pillələrində qərarlaşan komandaların birində oynamaq bacarığına malik olduğu qeyd edilib.
Qeyd edək ki, LKS Polşa çempionatını 24 xalla sonuncu pillədə başa vurub. Qışda komanda ilə 1,5 illik müqavilə bağlayan Rahil 16 oyunda komandanın şərəfini qoruyub. O, müdafiənin əvəzolunmaz simasına çevrilib.
İdman.biz
