Sport24.az
"Qarşılaşmanın çətin keçəcəyini bilirdik. "Zirə" yüksək yerlər uğrunda mübarizə aparır. İlk hissədə yaxşı oyun nümayiş etdirdik. Üstün tərəf biz idik. Qol hesabını açdıq, amma təəssüf ki, ani diqqətsizlikdən qapımızda qol gördük. Bu da istər-istəməz rəqibə motivasiya verdi. İkinci hissənin əvvəlində önə keçdilər. Bundan sonra bir neçə qol fürsətlərimiz oldu, yararlana bilmədik. Növbəti oyunlara hazırlaşacayıq". Bu sözləri Sport24.az-a açıqlamasında"Şamaxı"nın futbolçusu Rafael Məhərrəmli deyib.
O, komandasının Misli Premyer Liqasının ikinci dövrəsinə uğursuz başalamsını belə izah edib:
"Qış fasiləsindən əvvəlki 4-5 matçda yaxşı oynayırdıq. Mövsümün ikinci yarısında ilk rəqibimiz "Qarabağ" idi ki, onların da gücü hər kəsə bəllidir. Hər iki oyunda xal götürə bilərdik. Gələcək oyunlarda bundanda yaxşı olacayıq".
Məhərrəmli "Şamaxı"nın Premyer Liqada qalmaq şanslarını dəyərləndirib:
"Bu haqda yalnız bir söz deyə bilərəm ki, oyunlara köklənmişik. Üzərimizdə işləyib, daha da irəli getmək istəyirik. Rəqiblərimizin hamısı yaxşı komandalardır. İnşallah, Premyer Liqada qalarıq".
