Qurbanovdan narazılıq: “Cərimə zərbəsi olduğunu mən deməliyəm?”

Misli Premyer Liqasının XX turunun "Qarabağ" – "Turan Tovuz" (1:2) oyunundan sonra meydan sahibi komandanın baş məşqçisi Qurban Qurbanov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…

– Məğlub olmaq istəməzdik. Amma futbolçularım demək olar ki, 90 dəqiqə dominantlıq edə bildilər. Ancaq futbolun belə çrikin tərəfləri var. "Turan Tovuz"u təbrik edirəm.

– Son 2 oyunda kornerdən 4 qol buraxmısız…

– Keçən oyunla bağlı cavablandırdım. Amma belə necə olur bilmirəm. Cərimə meydançası daxilində qapıçının ətrafında 5 futbolçu varsa və onu blok edirlərsə necə olmalıdır. Hakimlər Komitəsinin sədri bu barədə necə düşünür? Neçə oyundur ki, həm korner, həm də cərimə zərbələrində belə hallar olur. Hətta oyundan qabaqda bu barədə futbolçularla danışıram. Amma qapıçı toxunulmazdırsa, burada toxunurlarsa necə olur, bilmirəm. 2-ci qol səhvimizdən oldu başa düşdük. Ancaq 1-ci qol… sanki hakimlər belə qollara bəsit yanaşırlar. Epizoda baxsaz, əllə itələyir bizim futbolçunu. Təkcə bizim yox, bütün oyunlarda belə hallar olur. Əlbəttə, bu məğlub olmağımıza səbəb deyil. Ancaq bu dəfə… Futbolçularımızı iki əlli kənara atırlar. Buna əsəbiləşdim. 10 dəfə baxdım epizoda. Faiq Hacıyevin tapşırığı ümumiyyətlə qapıçıya toxunmaq idi. Hər tərəfdən Şahruddini sıxdılar. Nəysə, belə hallar olur. Rəqibi təbrik edirəm. İstəkli idilər.

– Yəqin ki, hakimlərin sizə qarşı qərəzli olduğunu düşünmürsüz?

– Məsuliyyətsizdirlər. Cavid Cəlilov yaxşı oğlandır. Ancaq belə sadə yanaşma olmaz. Camaat həftələrlə, aylarla əziyyət çəkir. Sadə epizodlardan qollar buraxdıq. Orada cərimə zərbəsi olduğunu mən deməliyəm?

– Üzvü olduğunuz İcraiyyə Komitəsində bu məsələni qaldıracaqsız?

– Ehtiyac yoxdur. Ora belə şeylərin yeri deyil. Hakimlər Komitəsinin sədriylə belə epizodlar müzakirə olunur. Məsuliyyət çox vacibdir. Çünki burada biz aldığımızın haqqını verməliyik. Hamı bu düşüncəylə yanaşmalıdır. O cümlədən də hakim. Bəzi epizidlar oldu ki, normaldır. Təhlükə görünmürsə, anlaşılandır. Bəlkə də belə gərgin oyunlar az olur. Yenə deyirəm, bu məğlubiyyətimizə səbəb deyil. Ancaq futbolçularımın əziyyətinə heyfim gəlir. İnşallah ki, digər oyunlara hazırlaşmalıyıq.

– Oyunçularınızın psixoloji durumunu necə dəyərləndirərdiz? 

– Məncə, futbolçular çox yaxşı idilər. Sadəcə bir az daha hazırlıqlı olmaq lazım idi.Olsaydı verərdilər. Birinci epizodu soruşdum, yox idi. Digərini bilmirəm.

– Sizin İK-dan getməyinizlə bağlı xəbər doğrudur?

– Xahiş edirəm, mənə bu barədə sual verməyin. Hələ ki, heç bir şey yoxdur. İnanın ki, heç evdə belə vaxt ayıra bilmirəm. Ancaq iş ev, ev iş.

– Bu gün Musa Qurbanlı meydandan çıxandan sonra Yassin Benzia forvard kimi oynayırdı. Gələcək planlarınıza bununla bağlı bir şey nəzərdə tutursuz?

– Bütün oyunlarda yox, onu hücumda istifadə edəcəyik.

– Konkret olaraq danışıq apardığınız futbolçular var?

– Xeyr, heç bir danışıq olmayıb. Bəlkə 20 gün əvvəl 2 futbolçu ilə maraqlandıq. Danışığımız oldu və orada da qaldı.

– Əlinizdəki heyətlə mövsüm sonu çempion olacağına yetərlidir?

– Başqa çıxış yolumuz yoxdur. Say olaraq transfer etmək istəmirik. Futbolçunu kollektivə uyğunlaşdırmaq asan deyil. Mental olaraq onun kluba, ölkəyə adaptasiya olması çətindir. Bu, dəfələrlə olub. Görürsən ki, bizə uyğunlaşa bilməyib, amma başqa çempionatlarda daha yaxşı çıxış edib. "Qarabağ"da oynamaq asan deyil. Həm çempionluq, həm avrokuboklarda iştirak tələb olunur. Çox ehtiyatlanırıq. Bizim büdcəmiz böyük klublar kimi deyil. Çempionluq çətindir. Bir neçə belə oyun olsa çempionluq əldən gedə bilər. "Top-5" ölkələrində belə hallar olur. Arxayınlaşmaq olmaz. Futbolçularımda da görmədim. 90 dəqiqə 3 xal əlimizdə idi. 2 dəqiqə içərisində əldən getdi. Mən indiki heyəti daha yaxşı toparlaya bilərəm nəinki yeniləri.

– Avropa Liqasındakı rəqibiniz "Olimpiakos" haqda nə düşünürsüz?

– "Olimpiakos" güclü rəqibdir. Ən sürətli oynayan komandalardan biridir. Amma hazırlaşmalıyıq. Məncə, daha rahat oynayacayıq. Çünki stres az olacaq. Bu mövsüm yaxşı oyunlarımız oldu, amma nəticələrimiz yaxşı olmadı. İndi əlimizdəki futbolçuları qoruyub saxlamalıyıq.