İdman.biz
"Futbolçularımı təbrik edirəm. Maraqlı, bol qollu oyun oldu. Azarkeşlərə təşəkkür edirəm".
İdman.biz xəbər verir ki, bunu Azərbaycan Premyer Liqasının XXXV turunda "Turan Tovuz"la oyundan sonra "Qarabağ"ın baş məşqçisi Qurban Qurbanov deyib.
Təcrübəli mütəxəssis Azərbaycan futbolunda infrastrukturun qurulması üçün hansı müddətin tələb olunması ilə bağlı fikir bildirib. Qurbanov "Qarabağ"ı nümunə gətirib: "Vaxt demək düzgün çıxmaz. Mütləq yaxşılaşdırmaq lazımdır. Klublar böyüsə, stabil iş prinsipləri olsa, elə də vaxt lazım deyil. Bizim öz bazamızı ərsəyə gətirməyə maksimum iki il vaxt getdi. Məncə istək olsa, elə də uzun vaxt aparmaz. İnfrastruktur ən vacib amillərdən biridir".
"Qarabağ"ın baş məşqçisi mövsümün son 2 turunda VAR-a əcnəbi hakimlərin dəvət olumasını müsbət hesab etməyib: "Mən bunu heç xoş qarşılamadım. Hamımız öz sahəmizdə aktiv olmağa çalışmalıyıq. Səhvlər olur. Bilmirəm VAR sistemi nə dərəcədə qəlizdir. Cavan kadrlardır, ola bilər ki, haradasa səhv edərlər. Bizim hakimimiz Əliyar Ağayev Yunanıstan çempionatında oyun idarə edir. Bizdən ora gedirlərsə, deməli güvənirlər. Hakimlərimiz elə etməlidir ki, başqalarına şans verilməsin".
Qeyd edək ki, "Qarabağ" "Turan Tovuz"a 4:3 hesabı ilə qalib gəlib.
İdman.biz
