Sport24.az
Bu gün Konfrans Liqasında II təsnifat mərhələsinin püşkü atılacaq. Sport24.az xəbər verir ki, İsveçrənin Nyon şəhərindəki tədbir Bakı vaxtı ilə saat 16:00-da başlayacaq.
Qitə futbol qurumu püşkdən öncə komandaları qruplara bölüb. Azərbaycan təmsilçiləri "Sabah"la "Sumqayıt", həmçinin Avropa Liqasında oynayacaq "Zirə"nin də mümkün rəqiblərinin sayı azalıb.
2-ci qrupda səpələnməmiş olan Sumqayıtın eyniadlı klubunu beş variant gözləyir. "Başakşəhər", "Hapoel" BŞ, "Omoniya", "Fehervar" və "Sankt Qallen" təmsilçimizin rəqibləridir.
"Şerif" – "Zirə" cütünün məğlubu 5-ci qrupda səpələnməmişdir. Bu cütdə uduzan komandanı 5 variant gözləyir: "Vaasa" – "Jalgiris" cütünün qalibi, "Riqa", "Olimpiya", "Dunayska Ştreda", "Banik".
9-cu qrupa düşən "Sabah"ın 4 mümkün rəqibi var. Səpələnməmiş olan paytaxt təmsilçisi "Makkabi" H, "Astana", AEK klubları və ya "Marsakloks" – "Partizani" cütünün qalibi ilə görüşəcək.
Qeyd edək ki, II təsnifat mərhələsi iyulun 25-də və avqustun 1-də baş tutacaq.
