Idman.biz
Çempionlar Liqasının qrup mərhələsinin startında ikinci qələbə ağdamlıların top 24-lüyə düşmək arzusuna bir qədər də yaxınlaşmağa imkan yaradacaq.
Belə ki, Bakı bu gün xüsusi futbol axşamına hazırlaşır: "Qarabağ" Çempionlar Liqasının qrup mərhələsinin ikinci turu çərçivəsində Tofiq Bəhramov adına Respublika stadionunda Danimarkanın "Kopenhagen" klubunu qəbul edəcək.
Azarkeşlər bu gün yenidən "Qarabağ"la "Kopenhagen"in qarşılaşmasını izləmək şansı qazanacaqlar. Xatırladaq ki, bu klublar 2017-ci ildə Çempionlar Liqasının pley-off mərhələsində qarşılaşıblar, o zaman Ağdam klubu o vaxtkı səfər qolları qaydası (ev oyununda 1-0 qələbə, səfərdə 2:1 məğlubiyyət - red) sayəsində ilk dəfə avrokubokların qrup mərhələsinə yüksəlmişdi.
Rəqiblərin Çempionlar Liqasındakı startı fərqli alınıb. "Qarabağ" Lissabonda "Benfika"nı 3:2 hesabı ilə məğlub etdiyi halda, "Kopenhagen" evdə son dəqiqələrdə vurduğu qolun sayəsində "Bayer Leverkuzen"lə 2-2 bərabərə qalıb.
Bu nəticələr Bakıdakı qarşılaşmaya əlavə həyəcan qatır: "Qarabağ" turnirin ritmini tutub, qonaqlar isə sona qədər döyüşərək nəticə əldə etməyi bacardıqlarını sübut ediblər.
"Qarabağ"ın bugünkü heyəti azarkeşlərə yad deyil. Qapı Mateus Koxalskiyə etibar edilib. Müdafiənin mərkəzi Kevin Medina və Sami Mmaeyə, cinahlar isə Bolt və Elvin Cəfərquliyevə tapşırılıb. Yarımmüdafiə Kadi Borges və Zubir olacaq, Leandro Andrade və Aleksey Kaşuk isə bu xəttə dinamiklik qatmağa çalışacaqlar. Hücumda isə "Benfika" ilə oyunda qollardan birinə imza atan Kamilo Duran olacaq.
"Benfika" ilə oyundan sonra Marko Yankoviçin olmaması "Qarabağ" üçün ciddi itki sayıla bilər. Komandada digər zədəli isə hücumçu Nəriman Axundzadədir.
Yakob Nestrupun "Kopenhagen"i güclü yarımmüdafiə və sürətli keçidlər üzərində qurulub. Tomas Delaney və Lukas Leraqer yarımmüdafiəni idarə edir, Viktor Klaesson isə liderlik edir. Qonaqların Məhəmməd Əlyunussi, Elias Aşuri kimi təhlükəli oyunçuları və Rodriqo Uskas kimi vingeri var. Hücumda isə almaniyalı Yussuf Mukokoya diqqət yönəldiləcək.
Bununla belə, danimarkalıların heyətində itkilər də mövcuddur: Andreas Kornelius, Maqnus Mattsson və Conatan Moalem oyun üçün hazır deyil.
Statistika da "Kopenhagen"in xeyrinə deyil – Çempionlar Liqasının son 20 səfər matçında komanda yalnız iki dəfə qalib gəlib.
Oyunun ssenarisi gərgin görünür: "Qarabağ" tempi diktə etməyə və cinahlardan oynamağa çalışacaq. "Kopenhagen" isə mərkəzdə topa nəzarət etməyə, sürətli hücumlar qurmağa və standart vəziyyətlərdən faydalanmağa çalışacaq.
Meydan sahibləri üçün əsas vəzifə top itkisi zamanı nizam-intizamı qorumaq, Kadi və Zubir vasitəsilə presinqdən çıxmaq olacaq.
Əgər "Qarabağ" ardıcıl ikinci oyununda qalib gələrsə, xallarını 6-ya çatdıracaq və ilk 24-lüyə düşmək şansını reallığa çevirəcək. Çempionlar Liqasının yeni formatında bu, pley-off mərhələsinə çıxmaq arzularını gerçəkləşdirmək üçün real fürsət yaradır.
Beləliklə, bu gün Tofiq Bəhramov adına Respublika stadionunda yaddaqalan qarşılaşma gözlənilir. Qurban Qurbanovun komandası pley-offa vəsiqə qazanmaq yolunda vacib addım ata bilər.
Teymur Tuşiyev
