Idman.biz
Fransa Liqa 1-in doqquzuncu turunda keçirilən iki qarşılaşmada ümumilikdə 13 qol vurulub. PSJ səfərdə "Havr" üzərində böyükhesablı qələbə qazanaraq liderliyini qoruyub, "Nitsa" isə doğma meydanda "Renn"dən üstün olub.
İdman.Biz xəbər verir ki, PSJ "Osean" stadionunda "Havr"ı 5:1 hesabı ilə məğlub edib.
Meydan sahibləri 18-ci dəqiqədə Coş Mayanın qolu ilə önə keçiblər. Lakin 26-cı dəqiqədə Mika Qodts hesabı bərabərləşdirib, iki dəqiqə sonra isə Aşraf Hakimi Paris klubunu irəli çıxarıb.
İkinci hissədə mərakeşli müdafiəçi görüşün əsas qəhrəmanına çevrilib. Hakimi 55-ci dəqiqədə dublunu rəsmiləşdirib, 62-ci dəqiqədə Senni Mayulu hesab arasındakı fərqi artırıb. 69-cu dəqiqədə isə Hakimi üçüncü qolunu vuraraq het-trikə imza atıb.
Bundan əlavə, müdafiəçi iki məhsuldar ötürmə verərək PSJ-nin beş qolunun hamısında birbaşa iştirak edib.
Doqquz turdan sonra 20 xal toplayan PSJ Liqa 1-in turnir cədvəlinə başçılıq edir. İki xalı olan "Havr" isə 18-ci, sonuncu pillədə qərarlaşıb.
Turun digər qarşılaşmasında "Nitsa" doğma meydanda "Renn"i 5:2 hesabı ilə məğlub edib.
Meydan sahiblərinin heyətində Eli Vai het-trikə imza atıb. O, 12 və 34-cü dəqiqələrdə penaltilərdən, 73-cü dəqiqədə isə oyundan fərqlənib. "Nitsa"nın digər qollarını Conatan Kloss və Məhəmməd Amura vurublar. "Renn"in heyətində isə Sebastyan Şimanski və Bulaye Dia fərqləniblər.
Növbəti turda PSJ noyabrın 7-də "Trua"nı qəbul edəcək, "Havr" isə noyabrın 8-də səfərdə "Loryan"la qarşılaşacaq.
