2023/2024-cü illər mövsümündə İngiltərə Premyer Liqasında 380 oyuna 1246 qol vurulub. Mövsüm ərzində 298 futbolçu rəqib qapısına yol tapıb.
İdman.biz mövsümün ən yaxşı qolçuları ilə bağlı statistikanı diqqətə çatdırır.
Son Premyer Liqa mövsümünün ən yaxşı bombardiri ötənilki qədər vurmasa da, yenə də "Mançester Siti"nin forvardı Erlinq Holand olub. Ötən il 36 qolla birinci olmuş forvard, bu dəfə mövqeyini keçirdiyi 31 oyunda vurduğu 27 qolla (hər oyuna orta – 0,87) qoruyub.
Cari mövsümün bombardirlər mübarizəsində "Çelsi" və "Mançester Siti" formasında 34 oyuna çıxmış Koul Palmer 22 qolla ikinci, 34 oyunda 21 dəfə fərqlənmiş Aleksander İsak ("Nyukasl") üçüncü olub.
19 qolla dördüncü olan Fil Foden də çempion "Mançester Siti"nin təmsilçisidir. Olli Uotkins ("Aston Villa", 19 qol), Dominik Solanke ("Bornmut", 19), Məhəmməd Salah ("Liverpul", 18), Son Xın Min ("Tottenhem", 17) də məhsuldar futbolçular sırasındadırlar. Carrod Bouen ("Vest Hem"), Jan-Filipp Mateta ("Kristal Pelas") və Bukayo Saka ("Arsenal") hərəyə 16 dəfə fərqləniblər.
Mövsümün "penaltilər kralı" 9 qolla Koul Palmerdir. Elinq Holand 7, Bukayo Saka 6 dəfə fərqlənib. Ən çox penalti qaçıran Məhəmməd Salahdır. Misirli futbolçu 7 səhdindən 2-sində uğursuz olub.
Çempionatın ikinci bombardiri Koul Palmer və dördüncüsü Fil Foden yarımmüdafiəçidirlər. Orta xətt futbolçularından Bukayo Saka üçüncü göstəriciyə malikdir.
Müdafiəçilərdən ən çox fərqlənən Kristian Romerodur ("Tottenhem") – 5 qol.
Premyer Liqada məhsuldar ötürmələrdə ən çox fərqlənən Olli Uotkinsdir ("Aston Villa") – 13 dəfə. Koul Palmer ("Çelsi"/"Mançester Siti") 11 dəfə assistentlik edib. 9 futbolçunun 10 assisti var. Ümumiyyətlə, mövsümdə 283 futbolçu qol assistentliyi edib.
Qol və məhsuldar ötürmələrin ümumi sayına görə Premyer Liqanın lideri Koul Palmerdir – 33. O, 22 qol vurub, 11 assistentlik edib. Elinq Holandla Olli Uotkinsdə bu göstərici 32-dir. "Mançester Siti"li 27 qoluna 5 məhsulda ötürmə əlavə edibsə, "Aston Villa"lı 19 qol, 13 ötürmənin müəllifidir.
Ümumilikdə Premyer Liqanın 365 futbolçusu komandasına qol və ya assistentliklə kömək edə bilib.
Vüqar Məmmədov
İdman.biz