Idman.biz
İngiltərə Premyer Liqasının 30-cu turu çərçivəsində keçirilən qarşılaşmada "Liverpul" doğma divarlar arasında "Tottenhem"i qəbul edib. "Enfild" stadionunda baş tutan gərgin mübarizə 1:1 hesablı heç-heçə ilə yekunlaşıb.
İdman.Biz xəbər verir ki, matça sürətli başlayan meydan sahibləri artıq 18-ci dəqiqədə Dominik Soboslainin vurduğu qolla hesabı açıblar. Qarşılaşmanın böyük hissəsində üstünlüyünü qoruyan "Liverpul" qələbəyə yaxın olsa da, oyunun son dəqiqələrində dramatik anlar yaşanıb. 90-cı dəqiqədə səhnəyə çıxan Rişarlison rəqib qapısına yol taparaq "mahmızlar"ı məğlubiyyətdən xilas edib.
Bu nəticədən sonra xallarının sayını 49-a çatdıran "Liverpul" turnir cədvəlində "Çelsi"ni (48 xal) geridə qoyaraq beşinci pilləyə yüksəlib. Bütün turnirlərdə ardıcıl altı məğlubiyyətdən sonra ilk xalını qazanan "Tottenhem" isə 30 xalla 16-cı yerdə qərarlaşıb.
20:06
İngiltərə Premyer Liqasının 30-cu turunda turnir cədvəlinin üst sıraları üçün həlledici əhəmiyyət kəsb edən matç baş tutub. "Mançester Yunayted" öz meydanında "Aston Villa"nı qəbul edib və 3:1 hesablı inamlı qələbə qazanıb.
İdman.Biz xəbər verir ki, "Old Trafford" stadionunda keçirilən qarşılaşmada bütün qollar ikinci hissədə vurulub. 53-cü dəqiqədə Kazemiro hesabı açaraq meydan sahiblərini önə keçirib. Qonaqlar 64-cü dəqiqədə Ross Barklinin qolu ilə tarazlığı bərpa etsələr də, bu, xal qazanmaq üçün kifayət etməyib. 71-ci dəqiqədə Mateus Kunya, 81-ci dəqiqədə isə Benjamin Şeşko fərqlənərək matçda son nöqtəni qoyublar.
Bu qələbədən sonra xallarının sayını 54-ə çatdıran "Mançester Yunayted" turnir cədvəlində üçüncü pilləyə yüksəlib. 51 xalı olan "Aston Villa" isə dördüncü sırada qərarlaşıb.
Qeyd edək ki, növbəti turda "qırmızı şeytanlar" martın 20-də səfərdə "Bornmut"la qarşılaşacaq. Birmingem təmsilçisi isə martın 22-də "Vest Hem Yunayted"i qəbul edəcək.
Paralel keçən "Kristal Palas" - "Lids Yunayted" və "Nottinqem Forest" - "Fulhem" oyunlarında hesab açılmayıb. Bu nəticələrdən sonra "Kristal Palas" 39 xalla 14-cü, "Lids Yunayted" 32 xalla 15-ci, "Nottinqem Forest" 29 xalla 17-ci, "Fulhem" isə 41 xalla 11-cidir.
