Lent.az
ABŞ millisinin baş məşqçisi Maurisio Poçettino "Tottenhem Hotspur" klubunun onun əvəzinə Roberto De Zerbini seçməsindən "çox məyus" qalıb.
Lent.az-ın xarici mediaya istinadla məlumatına görə, "Tottenhem"in keçmiş baş məşqçisi klub rəhbərliyinin seçimindən ciddi şəkildə narazıdır. Poçettino son aylarda bir neçə dəfə İngiltərə Premyer Liqasına qayıtmaq istədiyini açıq şəkildə ifadə edib. Bundan əlavə, o, London klubunda ilk fəaliyyəti dövründən sonra azarkeşlər arasında hələ də populyar fiqur olaraq qalır.
Klub rəhbərliyi düşünürdü ki, Poçettino yalnız Dünya Çempionatından sonra, yayın ortalarında azad olacaq. Halbuki De Zerbi dərhal komandaya qoşula bilirdi. Komandanın Premyer Liqadan düşmə təhlükəsi isə rəhbərliyi tez qərar verməyə məcbur edib və onlar Robertonun xidmətlərindən dərhal yararlanmağa üstünlük veriblər.
Poçettino 2014–2019-cu illərdə "Tottenhem"i çalışdırıb. Hazırda isə o, 2024-cü ilin sentyabr ayında təyin olunduğu ABŞ milli komandasına rəhbərlik edir.
