Idman.biz
İtaliyanın "Napoli" klubunda çıxış edən niderlandlı vinger Noa Lanq "Qalatasaray"a keçməyə yaxındır. Hücum xəttinə birbaşa əsas heyət səviyyəsində güclənmək istəyən İstanbul təmsilçisi futbolçunu satınalma hüququ ilə icarəyə götürməyə hazırlaşır.
İdman.Biz xəbər verir ki, mövsümün əvvəlində PSV-dən 25 milyon avro qarşılığında "Napoli"yə transfer olunan Lanq baş məşqçi Konte ilə münasibətlərin gərginləşməsindən sonra komandanı tərk etməyə razıdır.
Niderlandlı futbolçu Türkiyə variantını əsasən Çempionlar Liqası amilinə görə "Qalatasaray"ın xeyrinə dəyərləndirib.
Məlumata görə, 26 yaşlı oyunçunun yarım mövsüm üçün xərci 1,4 milyon avro (təxminən 2,8 milyon AZN) təşkil edəcək. İcarə müqaviləsinə isə məcburi olmayan satınalma hüququ daxil ediləcək. Həmin şərtin məbləği 25 milyon avro (təxminən 49,4 milyon AZN) səviyyəsindədir.
"Napoli"nin hücum xəttinə yeni transferləri rəsmiləşdirdikdən sonra Lanqın gedişinə icazə verəcəyi bildirilir. Sol cinahla yanaşı, hücumun arxasında və sağ kənarda da oynaya bilən futbolçu "Qalatasaray"da Yunus Akgünlə mövqe rəqabətinə girəcək.
Noa Lanq karyerası ərzində "Ayaks"la bir, PSV ilə iki dəfə Niderland çempionu olub, "Brügge" ilə isə Belçikada iki dəfə titul qazanıb. Niderland millisində 15 oyun keçirən vinger üç qol vurub. Maraqlı məqam ondan ibarətdir ki, futbolçu uşaq yaşlarında qısa müddət "Beşiktaş"ın infrastrukturunda da məşq keçib.
