"Neftçi" "Sabah"ı səfərdə məğlub edərək Konfrans Liqasına vəsiqə qazandı

Misli Premyer Liqasının 32-ci turunun son oyun günündə diqqətlər Masazıra yönəlib.

İdman.Biz xəbər verir ki, turun mərkəzi qarşılaşmasında "Neftçi" səfərdə çempion "Sabah" üzərində 2:1 hesablı əzmkar qələbə qazanaraq UEFA Konfrans Liqasına vəsiqəni təmin edib.

Matça sürətli başlayan meydan sahibləri artıq 3-cü dəqiqədə İsayevin qolu ilə hesabı açıblar. Lakin "Neftçi"nin cavabı gecikməyib. 9-cu dəqiqədə Ştoqrin tarazlığı bərpa edib.

İkinci hissədə oyun daha gərgin mübarizə şəraitində davam edib. Həlledici qolu isə 70-ci dəqiqədə Metyu vuraraq "ağ-qaralar"a vacib qələbə qazandırıb.

Beləliklə, "Neftçi" mövsümün bitməsinə bir tur qalmış avrokuboklara vəsiqəni rəsmiləşdirib.

Qarşılaşmadan sonra "Bank Respublika Arena"da Misli Premyer Liqasının mükafatlandırma mərasimi keçirilib və çempionluq kuboku "Sabah"a təqdim olunub.

18:00

Hazırda futbol üzrə Misli Premyer Liqasının 32-ci turu çərçivəsində "Sabah" və "Neftçi" komandaları arasında qarşılaşma keçirilir.

İdman.Biz xəbər verir ki, oyun "Bank Respublika Arena"da baş tutur.

Matçın baş hakimi Kamal Umudludur.

10:05

Bu gün futbol üzrə Misli Premyer Liqasının 32-ci turu çərçivəsində keçiriləcək ikinci qarşılaşma "Bank Respublika Arena"da baş tutacaq.

İdman.Biz xəbər verir ki, "Sabah" "Neftçi"ni qəbul edəcək.

Oyun saat 18:00-da başlayacaq. "Sabah" 75 xalla turnir cədvəlinin birinci pilləsində yer alıb. 53 xala malik "Neftçi" isə dördüncüdür.

Misli Premyer Liqası
Üçüncü dövrə, 32-ci tur
17 may (bazar)
18:00. "Sabah" - "Neftçi"
Hakimlər: Kamal Umudlu, Namik Hüseynov, Vüsal Məmmədov, Elvin Bayramov.
VAR: Fərid Hacıyev.
AVAR: Akif Əmirəli.
Hakim-inspektor: Asim Xudiyev.
AFFA nümayəndəsi: Erkin Hüseynov.
"Bank Respublika Arena"