Idman.biz
"Milan" heyətinin əsas futbolçularını komandada saxlamaq üçün müqavilələrin yenilənməsi prosesini davam etdirir. Klub Kristian Pulisiç və Strahinya Pavloviçdən sonra Adrien Rabio və Alfaco Sisse ilə də yeni razılaşma əldə etməyi planlaşdırır.
İdman.Biz İtaliya mediasına istinadən xəbər verir ki, "Milan" rəhbərliyi fransalı yarımmüdafiəçi Rabioya daha sərfəli maliyyə şərtləri təklif etməyə hazırlaşır. Hazırda futbolçunun illik xalis maaşı 3,5 milyon avro (5,95 milyon manat) təşkil edir.
Klub danışıqları uzatmadan dekabr ayınadək razılığa gəlmək niyyətindədir.
"Milan"ın digər prioriteti gənc hücumçu Alfaco Sissenin müqaviləsini yeniləməkdir. Futbolçu bu mövsüm A Seriyası və Avropa Liqasında ümumilikdə yeddi qol vurub. O, son olaraq "Bolonya" ilə görüşdə dubla imza atıb.
Sissenin hazırkı müqaviləsi 2030-cu ilədək qüvvədədir. İllik təxminən 800 min avro (1,36 milyon manat) qazanan hücumçunun maaşının yeni razılaşma əsasında iki milyon avroya (3,4 milyon manat) yaxınlaşdırılması gözlənilir.
Qeyd edək ki, "Milan" daha əvvəl Kristian Pulisiçlə müqaviləni 30 iyun 2031-ci ilədək uzadıb. Amerikalı futbolçunun illik xalis qazancı bonuslar daxil olmaqla yeddi milyon avroya (11,9 milyon manat) çata bilər.
İtaliya klubu bu addımlarla əsas futbolçularını uzun müddət komandada saxlamağı hədəfləyir.
