Idman.biz
İngiltərənin "Mançester Yunayted" klubunun baş məşqçisi Maykl Kerrik Premyer Liqanın 24-cü turunda "Fulhem"ə qarşı qazanılan 3:2 hesablı qələbə ilə bağlı fikirlərini bölüşüb.
İdman.Biz xəbər verir ki, mütəxəssis "Old Trafford" stadionunun xüsusi aura daşıdığını vurğulayıb və oyunun çətin keçəcəyini əvvəlcədən gözlədiklərini bildirib. Kerrikin sözlərinə görə, həftəboyu komandanın aşağı blokda müdafiə olunan rəqiblərə qarşı necə çıxış edəcəyi ilə bağlı suallar ünvanlanıb, lakin "Fulhem" bu kateqoriyaya aid edilməməlidir.
Baş məşqçi London təmsilçisinin güclü komanda olduğunu xüsusi qeyd edib və futbolçularına matçdan əvvəl bunu dəfələrlə xatırlatdığını deyib. Onun fikrincə, yaxşı oyun avtomatik qələbə demək deyil və bu qarşılaşmada da maksimum səy göstərmək lazım olub.
Kerrik fasilədə futbolçularına oyunun gözlədiyi ssenari üzrə getdiyini, ciddi mübarizə aparmalı olduqlarını çatdırdığını bildirib. O, "Fulhem"in daha əvvəl "Mançester Siti"yə qarşı geridönüş etməyə yaxın olduğunu xatırladaraq, bu komandanın təzyiq gücünə diqqət çəkib.
