Sport24.az
Avropanın bir çox klubunun transfer siyahısında yer alan Mark Qehi "Kristal Pelas"dan ayrılacaq. Sport24.az xəbər verir ki, bu barədə Premyer Liqa klubunun baş məşqçisi Oliver Qlasner məlumat verib.
Avstriyalı mütəxəssis kapitanın mövsümün sonunda başa çatan müqaviləsinin uzadılmayacağını bildirib:
"Mark artıq bizə yeni müqavilə imzalamayacağını bildirib. O, gələn il komandadan ayrılacaq. Klub kapitanın qalmasını istəyirdi. Ona yeni müqavilə təklif olunub. Lakin Mark dedi ki, mən başqa yerdə oynamaq istəyirəm".
Qeyd edək ki, "Kristal Pelas" Mark Qehini 2021-ci ilin yayında "Çelsi"dən transfer edib. İngiltərə millisinin üzvü olan 25 yaşlı mərkəz müdafiəçisi bu mövsüm London təmsilçisinin heyətində meydana çıxdığı 12 rəsmi matçda 1 qol və 1 məhsuldar ötürmə ilə yadda qalıb.
