La Liqa: "Xetafe" - "Selta" heç-heçəsi, "Betis"in qələbəsi və "Real"ın "Rayo Valyekano" üzərində çətin qələbəsi

İspaniya La Liqasında 22-ci turun oyunu çərçivəsində "Xetafe" doğma meydanda "Selta" ilə heç-heçə edib.

İdman.Biz xəbər verir ki, qarşılaşma 0:0 hesabı ilə başa çatıb. Bu nəticədən sonra "Selta" 33 xalla çempionatın turnir cədvəlində 7-ci pillədə qərarlaşıb. "Xetafe" isə 23 xalla 16-cı yerdədir və bütün turnirlər üzrə qələbəsiz oyunlar seriyasını doqquz matça çatdırıb.

21:51

İdman.Biz xəbər verir ki, İspaniya La Liqasında 22-ci turun oyunu çərçivəsində "Betis" doğma meydanda "Valensiya"ya qalib gəlib.

Sevilya təmsilçisi rəqibini 2:1 hesabı ilə məğlub edib. Qarşılaşmada hesab 20-ci dəqiqədə qonaqların hücumçusu Luis Rioxanın qolu ilə açılıb. Cəmi üç dəqiqə sonra "Betis" penalti zərbəsindən yararlanıb və Çimi Avila tarazlığı bərpa edib. Oyunda son sözü isə 88-ci dəqiqədə Pablo Fornals deyib və meydan sahiblərinə qələbə qazandıran qolu vurub.

Bu nəticədən sonra "Betis" 35 xalla La Liqa turnir cədvəlində beşinci pilləyə yüksəlib. "Valensiya" isə 23 xalla 15-ci yerdə qərarlaşıb.

19:20

İspaniya La Liqasının 22-ci turunda "Real" doğma meydanda "Rayo Valyekano"nu 2:1 hesabı ilə məğlub edib. Qarşılaşma Madriddə, "Santyaqo Bernabeu" stadionunda keçirilib.

İdman.Biz xəbər verir ki, oyunda hesabı 15-ci dəqiqədə "Real"ın vingeri Vinisius Junior açıb. 49-cu dəqiqədə qonaqların yarımmüdafiəçisi Xorxe de Frutos tarazlığı bərpa edib. 80-ci dəqiqədə "Rayo Valyekano"nun futbolçusu Pate Siss birbaşa qırmızı vərəqə alaraq meydandan qovulub.

Oyunun taleyini isə əlavə olunmuş vaxtda təyin olunan penalti həll edib. 90+10-cu dəqiqədə Kilian Mbappe penaltini dəqiq yerinə yetirərək "Real"a qələbə qazandırıb.

22 turdan sonra "Real" 54 xalla turnir cədvəlində ikinci pillədə qərarlaşıb. "Rayo Valyekano" isə 22 xalla 17-ci yerdədir.

Növbəti turda "Rayo Valyekano" fevralın 7-də evdə "Oviedo" ilə qarşılaşacaq, "Real" isə fevralın 8-də səfərdə "Valensiya"nın qonağı olacaq.