Idman.biz
İspaniya La Liqasının 28-ci turunda "Real Sosyedad" öz meydanında "Osasuna"nı qəbul edib. "Reale Arena"da keçirilən qarşılaşma meydan sahiblərinin 3:1 hesablı qələbəsi ilə yekunlaşıb.
İdman.Biz xəbər verir ki, basklar oyuna sürətli başlayaraq üstünlüyü ələ keçiriblər. Hesabı 24-cü dəqiqədə Mikel Oyarzabal penalti zərbəsi ilə açıb. Daha sonra səhnəyə Qonsalu Qedeş çıxıb. Portuqaliyalı vinger 28 və 52-ci dəqiqələrdə rəqib qapısına yol taparaq dublunu rəsmiləşdirib. Hər iki qolun ötürməsini Benyat Turrientes verib. Qonaqların təsəlli qolunu isə 77-ci dəqiqədə Viktor Munyos vurub.
Bu qələbədən sonra xallarının sayını 38-ə çatdıran "Real Sosyedad" turnir cədvəlində yeddinci yerə yüksəlib. 34 xalı olan "Osasuna" isə 11-ci pillədə qərarlaşıb.
23:45
İspaniya La Liqasının 28-ci turu çərçivəsində keçirilən "Betis" - "Selta" qarşılaşması bərabərliklə yekunlaşıb. Matçda tərəflər hərəyə bir dəfə fərqləniblər - 1:1.
İdman.Biz xəbər verir ki, oyun qonaqların sürətli qolu ilə başlayıb. Dördüncü dəqiqədə "Selta"nın hücumçusu Ferran Xutqla rəqib qapısına yol taparaq hesabı açıb. Lakin fasilədən dərhal sonra - 49-cu dəqiqədə meydan sahibləri status-kvonu bərpa ediblər. Müdafiəçi Ektor Bellerin dəqiq zərbə ilə tarazlığı təmin edib.
Bu heç-heçə ilə "Betis" bütün turnirlərdəki qələbəsizlik seriyasını beş oyuna çatdırıb. Hazırda 44 xalı olan Manuel Pelleqrininin yetirmələri turnir cədvəlində beçinci pillədə qərarlaşıblar. 41 xalı olan "Selta" isə onlardan bir pillə aşağıdadır.
21:22
İspaniya La Liqasının 28-ci turu çərçivəsində keçirilən "Barselona" - "Sevilya" qarşılaşmasında ev sahibi rəqibə göz açmağa imkan verməyib.
İdman.Biz xəbər verir ki, oyunun ilk 45 dəqiqəsi kifayət qədər məhsuldar alınıb. Matça sürətlə başlayan "Barselona"nın braziliyalı ulduzu Rafinya doqquz və 21-ci dəqiqələrdə penaltiləri dəqiq yerinə yetirərək dubl müəllifi olub. 38-ci dəqiqədə isə Dani Olmo rəqib qapısına yol taparaq hesabı 3:0-a çatdırıb.
Lakin qonaqlar ilk hissənin son saniyələrində fərqi azaltmağa nail olublar. Matçın 45+4-cü dəqiqəsində "Sevilya"nın müdafiəçisi Oso kataloniyalıları mərkəzə dəvət edib.
Oyunun 51-ci dəqiqəsində Rafinya het-trik edib. 60-cı dəqiqədə isə oyunun ən yaxşılarından olan Joao Kansello komandasının beşinci qolunu vurub. İkinci hissənin uzatma dəqiqələrində "Sevilya" daha bir dəfə fərqlənib. Amma Djibril Sounun qolu sadəcə təsəlli xarakteri daşıyıb.
Qeyd edək ki, hazırda 70 xalla turnir cədvəlinin vahid lideri olan "Barselona"nın əsas rəqibi "Real"la arasında dörd xal fərq var. 31 xalı olan "Sevilya" isə 14-cü pillədə qərarlaşıb.
19:28
İspaniya La Liqasının 28-ci turunda "Espanyol" səfərdə "Malyorka"nın qonağı olub. Görüş meydan sahiblərinin 2:1 hesablı geridönüş qələbəsi ilə başa çatıb.
İdman.Biz xəbər verir ki, matçda hesabı 36-cı dəqiqədə qonaqların yarımmüdafiəçisi Şarl Pikel açıb. Lakin 54-cü dəqiqədə qolun müəllifi qırmızı vərəqə alaraq komandasını azlıqda qoyub.
Say üstünlüyündən yararlanan "Malyorka" 65-ci dəqiqədə Pablo Torrenin qolu ilə tarazlığı bərpa edib. Matçın sonuna yaxın, 88-ci dəqiqədə isə Samuel Koşta komandasına qələbə qazandıran topu tora qovuşdurub.
Bu məğlubiyyətlə "Espanyol" (37 xal) qələbəsiz oyunlar seriyasını 11 matça çatdırsa da, hələlik turnir cədvəlində yeddinci pillədədir. Beş oyunluq uğursuz seriyasına son qoyan "Malyorka" (28 xal) isə 16-cı mövqeyə yüksəlib.
