La Liqa: "Rayo Valyekano" səfərdə "Xetafe"ni, "Selta" isə evdə "Elçe"ni məğlub edib

İspaniya La Liqasında 34-cü turun oyunları keçirilir. "Xetafe" öz meydanında "Rayo Valyekano"nu qəbul edib. Qarşılaşma qonaqların 2:0 hesablı qələbəsi ilə başa çatıb.

İdman.Biz xəbər verir ki, matçın 38-ci dəqiqəsində Serxio Kamelyo hesabı açaraq "Rayo Valyekano"nu önə çıxarıb. Meydan sahibləri 64-cü dəqiqədə hesabı bərabərləşdirmək üçün əla şans qazansalar da, Mauro Arambarri penaltidən yararlana bilməyib. 73-cü dəqiqədə qonaqlar daha bir məhsuldar hücum təşkil ediblər. Xerard Qumbaunun ötürməsindən sonra Randi Ntekya topu qapıdan keçirərək görüşdə son nöqtəni qoyub.

Bu qələbədən sonra 42 xal toplayan "Rayo Valyekano" turnir cədvəlində 11-ci pillədə qərarlaşıb. Aktivində 44 xalı olan "Xetafe" isə yeddinci yerdədir.

18:37

İspaniya La Liqasında 34-cü turun oyunları keçirilir. Turnir çərçivəsində "Selta" öz meydanında "Elçe"ni qəbul edib. Qarşılaşma meydan sahiblərinin 3:1 hesablı qələbəsi ilə başa çatıb.

İdman.Biz xəbər verir ki, matçın 14-cü dəqiqəsində Xavi Ruedanın ötürməsini qola çevirən Uqo Alvares hesabı açıb. 30-cu dəqiqədə isə Yaqo Aspas fərqi iki topa çatdırıb.

İkinci hissənin sonunda "Elçe" fərqi azaltsa da, bu, qələbə üçün kifayət etməyib. 82-ci dəqiqədə Andre Silva penaltini dəqiq yerinə yetirib. Lakin görüşün sonlarında Uillot Svedberqin ötürməsindən sonra Borxa İqlesias üçüncü topu rəqib qapısından keçirərək yekun hesabı müəyyənləşdirib.

Bu nəticədən sonra "Selta" xallarını 47-yə çatdıraraq altıncı pilləyə yüksəlib. "Elçe" isə 38 xalla 14-cüdür.