Idman.biz
İtaliya A Seriyasının 23-cü turu çərçivəsində "Parma" və "Yuventus" komandaları arasında keçirilən oyun Turin klubunun inamlı qələbəsi ilə yekunlaşıb.
İdman.Biz xəbər verir ki, qarşılaşmada "Yuventus" 4:1 hesabı ilə qalib gəlib. Matçın hesabını 15-ci dəqiqədə qonaqların müdafiəçisi Bremer açıb. 37-ci dəqiqədə Ueston Makkeni fərqi iki topa çatdırıb.
İkinci hissənin əvvəlində "Yuventus" üçün xoşagəlməz məqam yaşanıb. 51-ci dəqiqədə Andrea Kambyaso topu öz qapısına göndərib. Lakin cəmi üç dəqiqə sonra Bremer yenidən fərqlənərək dubla imza atıb. 64-cü dəqiqədə isə hücumçu Conatan Devid hesabı 4:1 edərək oyunda son nöqtəni qoyub.
Bu nəticədən sonra "Yuventus" 23 oyunda 45 xal toplayaraq turnir cədvəlində dördüncü pillədə qərarlaşıb. Lider "İnter"lə xal fərqi 10-dur. "Parma" isə 23 xalla 16-cı yerdədir.
23:34
İtaliya A Seriyasında 23-cü turun oyunu çərçivəsində "İnter" səfərdə "Kremoneze"yə qalib gəlib.
İdman.Biz xəbər verir ki, qarşılaşma "nerazzurri"nin 2:0 hesablı qələbəsi ilə başa çatıb. Oyunda hesab 16-cı dəqiqədə argentinalı hücumçu Lautaro Martinesin qolu ilə açılıb. 31-ci dəqiqədə Pyotr Zelinski fərqi iki topa çatdırıb.
Bu nəticə ilə "İnter" 23 oyundan sonra 55 xal toplayaraq A Seriyasının turnir cədvəlində birinci pillədə qərarlaşıb. "Kremoneze" isə 23 xalla 15-ci yerdə qalıb.
20:07
İtaliya Seriya A-da 23-cü turun oyununda "Komo" doğma meydanda "Atalanta"nı qəbul edib. Qarşılaşma 0:0 hesablı heç-heçə ilə yekunlaşıb.
İdman.Biz xəbər verir ki, matçın səkkizinci dəqiqəsində qonaq komandanın müdafiəçisi Onest Ahanor birbaşa qırmızı vərəqə alaraq meydandan kənarlaşdırılıb. Buna baxmayaraq, "Atalanta" uzun müddət azlıqda mübarizə aparsa da, hesabı qoruyub saxlaya bilib.
Turun nəticəsindən sonra "Komo" 41 xalla turnir cədvəlində altıncı pillədə qərarlaşıb. "Atalanta" isə 36 xalla yeddinci sırada yer alır.
Növbəti turda fevralın 9-da "Atalanta" evdə "Kremoneze" ilə qarşılaşacaq.
Bu tur çərçivəsində həmin gün "Komo" komandası "Milan" ilə səfər oyunu keçirməli idi, lakin qarşılaşma müəyyən edilməmiş vaxta təxirə salınıb.
Oyunun Avstraliyanın Pert (Perth) şəhərində keçirilməsi planlaşdırılırdı, lakin Asiya Futbol Konfederasiyası (AFC) və digər qurumların irəli sürdüyü şərtlər, həmçinin maliyyə riskləri səbəbindən bu görüş nəzərdə tutulan tarixdə baş tutmayacaq.
18:38
İtaliya çempionatının Seriya A turnirinin 23-cü turunda "Torino" doğma meydanda "Leççe" ilə qarşılaşıb və 1:0 hesablı qələbə əldə edib.
İdman.Biz xəbər verir ki, oyunda yeganə qol 29-cu dəqiqədə meydan sahiblərinin hücumçusu Çe Adams tərəfindən vurulub.
Bu nəticədən sonra "Torino" 26 xalla turnir cədvəlində 13-cü pillədə qərarlaşıb. "Leççe" isə 18 xalla 17-ci yerdədir.
Növbəti turda "Torino" səfərdə "Fiorentina" ilə üz-üzə gələcək, "Leççe" isə öz meydanında "Udineze"ni qəbul edəcək.
