İtaliya A Seriyası: "Roma" "Torino"nu, "Fiorentina" "Bolonya"nı məğlub etdi, "Parma" - "Genoa" heç-heçə etdi

İtaliyanın A Seriyasında 21-ci turun "Milan" - "Leççe" qarşılaşması başa çatıb.

İdman.Biz xəbər verir ki, görüş meydan sahiblərinin 1:0 hesablı qələbəsi ilə yekunlaşıb.

Matçda vurulan yeganə qol ikinci hissədə qeydə alınıb. 76-cı dəqiqədə "Milan"ın hücumçusu Nikolas Füllkruq fərqlənərək komandasına üç xal qazandırıb.

Bu nəticədən sonra "Milan" 21 oyundan sonra 46 xal toplayaraq turnir cədvəlində ikinci pillədə qərarlaşıb. Çempionata 49 xalla "İnter" başçılıq edir. "Leççe" isə 17 xalla 17-ci yerdədir.

Növbəti turda "Milan" yanvarın 25-də "Roma" ilə qarşılaşacaq. "Leççe" isə bir gün əvvəl "Latsio"nu qəbul edəcək.

23:19

İtaliyanın A Seriyasında 2025/2026 mövsümünün XXI turu çərçivəsində "Torino" ilə "Roma" üz-üzə gəlib.

İdman.Biz xəbər verir ki, görüş "Roma"nın 2:0 hesablı qələbəsi ilə yekunlaşıb.

Matçın 23-cü dəqiqəsində "Roma"nın hücumçusu Doniell Malen hesabı açsa da, niderlandlı futbolçunun qolu ofsayd səbəbindən ləğv edilib. Üç dəqiqə sonra Malen bu dəfə qaydaları pozmadan fərqlənib və Paulo Dibaladan aldığı ötürməni qola çevirib. İkinci hissədə, 72-ci dəqiqədə isə argentinalı yarımmüdafiəçi Paulo Dibala paytaxt klubunun üstünlüyünü artırıb.

Bu nəticədən sonra "Roma" 21 oyundan sonra 42 xal toplayaraq turnir cədvəlində dördüncü pillədə qərarlaşıb. Çempionata 49 xalla Milanın "İnter" klubu başçılıq edir. "Torino" isə 23 xalla 12-ci sırada yer alır.

20:11

İtaliya A Seriyasının 21-ci turu çərçivəsində "Bolonya" "Fiorentina"nı qəbul edib.

İdman.Biz xəbər verir ki, qarşılaşma ev sahibi komandanın açıq üstünlüyü ilə keçsə də, sevinən tərəf qonaqlar olub - 1:2.

Oyunda hesabı 19-cu dəqiqədə "Fiorentina"nın heyətindən Rolando Mandraqora açıb. İlk hissənin sonuncu dəqiqəsində qonaqlar Roberto Pikkolinin qolu ilə hesab arasındakı fərqi artırıb. "Bolonya"nın təsəlli qolu 88-ci dəqiqədə Fabbiandan gəlib.

Bu oyundan sonra "Bolonya" xallarını 30-a çatdıraraq səkkizinci pilləyə yüksəlib. "Fiorentina" isə aşağı liqaya düşmək zolağından xilas ola bilmir - 17 xalla 18-ci pillə.

17:39

İtaliya A Seriyasının 21-ci turu çərçivəsində "Parma" "Genoa"nı qəbul edib.

İdman.Biz xəbər verir ki, bərabər şəraitdə keçən oyunda qalib müəyyənləşməyib. Matç qolsuz heç-heçə ilə başa çatıb.

21 oyundan sonra 23 xal toplayan "Parma" turnir cədvəlində 13-cü yerdədir. "Genoa" isə 20 xalla 16-cı pillədə qərarlaşıb.