Sport24.az
"Zirə"nin futbolçusu İsmayıl İbrahimlinin Sport24.az-a müsahibəsi
- Misli Premyer Liqasının 24-cü turunda "Qarabağ"a 1:3 hesabı ilə uduzduz. Bu məğlubiyyətə nə səbəb oldu?
- Gərgin və maraqlı qarşılaşma idi. Belə komandalarla görüşdə əlinə düşən fürsətlərdən yararlanmaq lazımdır. Amma biz yararlana bilmədik. Oyunun sonlarındakı epizodun penalti olduğunu deyirdilər.
- Bəs matçın əvvəlindəki epizod necə? Səncə, penalti deyildi?
- Meydanda gördüyümə əsasən deyə bilərəm ki, penalti verilməli idi.
- Rəqibin sürəti və tempi ilə ayaqlaşa bilirdiniz. Yaxşı nəticə üçün ustalıq səviyyəsi həlledici rol oynadı?
- Demək olar ki, başa-baş mübarizə aparırdıq. Amma "Qarabağ"ın gücü hamıya bəllidir. Onların oyun tempi daha yüksəkdir. Belə olanda da mübarizə aparmaq çətindir. Məncə, buna baxmayaraq yaxşı oyun nümayiş etdirdik. Belə komandalarla oyunda şans da sənin tərəfində olmalı idi. Bəzi epizodlarda isə belə olmadı.
- Mövsümün sonuna az qalıb. Avrokuboka vəsiqə qazanmaq şanslarınızı necə görürsünüz?
- Hazırda avrokuboklar uğrunda gərgin mübarizə gedir. Bacardığımız qədər yuxarı pillədə olmaq niyyətindəyik. Artıq hər oyunda bizə qələbə lazımdır. Çempionat həqiqətən gərgin keçir. "Kəpəz"lə görüşdə xal itirdik. Həmin rəqib avrokuboklara iddialı "Sumqayıt"a qalib gəldi. Oyunlar arasında fərq qoymuruq. Bizi daha çətin mübarizə gözləyir.
- Çempionatdakı fasilədən əvvəl "Karvan-Yevlax"ın qonağı olacaqsınız. Bu qarşılaşma ilə bağlı fikirlərin...
- Səfərə yalnız qələbə üçün gedəcəyik. Çətin olacağını bilirik. "Karvan-Yevlax"ın son matçda "Arax-Naxçıvan"a necə problem yaratdığını gördük. Burada meydan amili də önəmli rol oynayır.
- Aprelin əvvəlində Azərbaycan Kubokunda yarımfinala start veriləcək. Səncə, kubok yolu avrokuboklar üçün daha asandır?
- Artıq kubokda üç matçda məsələni həll etmək olar. Amma kubok yolu daha risklidir. Çünki ilk növbədə finala çıxmalısan. Çempionatda yer tutmadan fikrimizi finala yönəltsək, bu, riskdir. Belə bir şey etmək fikrimiz də yoxdur. Ona görə Premyer Liqada maksimum qədər yuxarı pilləyə qalxmaq niyyətindəyik.
- Martın sonunda ölkəmizdə "FIFA Series – 2026" turniri keçiriləcək. Dəvət gözləyirsənmi?
- Əlbəttə. Hər bir futbolçu kimi mən də yığmanın heyətində yer almaq istəyirəm.
- Səncə, milli bu turnirin qalibi ola bilər? Komandamız üçün mübasib rəqiblərdir...
- Bəli. Niyə də qalib gəlməyək? Milli komandaya çağırılsaq, məşqçilər rəqiblər haqqında bizə daha yaxşı məlumat verəcək.
