Idman.biz
İngiltərə millisinin qapıçısı Din Henderson "Kristal Pelas"la müqaviləsini yeniləyib.
İdman.Biz xəbər verir ki, London klubunun mətbuat xidməti qolkiperlə yeni müqavilənin 2030-cu ilin yayına qədər nəzərdə tutulduğunu açıqlayıb.
"Mançester Yunayted"in yetirməsi olan Henderson stabil oyun praktikası qazanmaq məqsədilə 2023-cü ilin avqustunda "Selherst Park"a keçib. Transfer məbləği təxminən 15 milyon funt-sterlinq təşkil edib.
Keçidindən sonra ingilis qapıçı qısa müddətdə məşqçilər korpusunun etimadını qazanaraq komandanın əsas qapıçısı statusunu möhkəmlədib və mütəmadi olaraq İngiltərə millisinin düşərgəsinə cəlb olunmağa başlayıb.
London klubunun rəhbərliyi digər klubların potensial marağından qorunmaq məqsədilə qapıçıya vaxtında yaxşılaşdırılmış şərtlər təklif etmək qərarına gəlib. Henderson özü də dəfələrlə "Selherst Park"da özünü maksimum rahat hiss etdiyini və yaxın illər üçün əsas ambisiyalarını məhz bu klubla bağladığını qeyd edib.
