I Liqanın ən sərrast futbolçusu: “Bombardir olmaqdan çox..."

Başa çatan mövsümdə adından söz etdirən futbolçulardan biri də MOİK-in üzvü Elmir Rəhimzadə oldu. Ordu klubunun "77 nömrə"si vurduğu 17 qolla həm də liqanın bombardiri adını qazandı. I Liqanın ən sərrast futbolçusu Sport24.az-ın suallarını cavablandırıb. Elmir həm geridə qalan "futbol ili"ni dəyərlənrib, həm də gələcək planları barədə danışıb.

- Başa çatan mövsümdə sərgilədiyin oyundan razı qaldın?
- Öncə onu qeyd edim ki, bu mövsüm maraqlı və intriqalı keçdi. Fikrimcə, I Liqa ilə əvəzedicilərin çempionatının ayrılması və idman prinsipinə görə sonuncu olan komandanın II Liqaya düşməsini nəzərə alsaq, daha rəqabətli çempionata izlədik. Öz oyunuma gəlincə, bu barədə mütəxəssislər fikir bildirsə, daha çəqsədəuyğun olar.

-Çempionluğa iddialı idiz. Amma sonda 3-cü pillədə qərarlaşdız. Birinci olmağınız üçün nə çatmadı?
- Çempionata yaxşı başladıq. İlk dövrəni birinci və məğlubiyyətsizliklə başa vurduq. Sadəcə, çempionatın gedişində vacib oyunlarda qızıla bərabər xallar itirdik, qələbə qazanmalı olduğumuz matçlarda məğlub olduq. Bunun nəticəsi olaraq da sona bir neçə tur qalmış çempionluq mübarizəsindən qopduq.  

- I Liqada çempionatın bombardiri oldun. Bunu bacaracağına inanırdın?
- Çempionatın ən sərrast futbolçusu olmağım xoşdu. Amma əsas olan komandamın uğurudu. Bombardir olmaqdan çox, MOİK ilə çempionluq yaşayıb, elitaya yüksəlməyi  istərdim.

- Mövsümlərarası fasilədə MOİK-i tərk etmək fikrin var?

- Ordu klubu ilə müqaviləmin müddəti başa çatır. Gələcək karyeramı harda davam etdirəcəyimi deyə bilmərəm. Hər halda ilk olaraq MOİK ilə danışıqlar aparacam. Odur ki, klub rəhbərliyinin təklif olsa, dəyərləndirə bilərəm.

- Qəzənfər Abbasovu məşqçi kimi necə xarakterizə edərdin?
- Baş məşqçimiz ilk dəfə idi I Liqa komandasının "sükanı arxasında" idi. Mən də onun rəhbərliyi altında ilk dəfə idi çıxış edirdim. Düşünürəm ki, Qəzənfər müəllim başa çatan mövsümdə yaxşı komanda formalaşdırmağı bacardı.

- Ölkə kubokunun finalında Xankəndidə "Qarabağ"la qarşılaşdız. Qarabağın əsas şəhərində meydana çıxanda hansı hissləri keçirdin?  
- Həmin anları sözlə ifadə etmək çətindi. Qısaca belə deyim ki, Avropayaya səs salmış "Qarabağ" kimi komanda ilə azad olunmuş Xankəndidə meydanda olmaq qürur verici idi. Tarixin bir parçası olmaq hər adama nəsib olmur. Bunu yaşadığıma görə, özümü xoşbəxt hesab edirəm.

ABDULLA İSMAYILOĞLU