Sport24.az
"Mövsümün ikinci yarısına yaxşı hazırlaşmışıq. Qarşıda bizi "Difai" ilə oyun gözləyir. Hazırda həmin matça köklənirik". Bu sözləri Sport24.az-a açıqlamasında "Karvan"ın futbolçusu Bəhruz Teymurov deyib.
31 yaşlı hücumçu məqsədlərinin I Liqada çempionluq əldə etmək olduğunu bildirib:
"Hələ heç nə bəlli deyil. Qarşıda çoxlu oyunlarımız var. Heç kim əsas rəqibimiz "Qəbələ"nin çempion olacağını deyə bilməz. Bizim də məqsədimiz var. Buna da çatacağımıza inanıram. I Liqada çempionluğa oynayırıq".
9 qolla aşağı dəstənin bombardiri olan Teymurov onun üçün komandanın Premyer Liqaya vəsiqə qazanmasının daha önəmli olduğunu söyləyib:
"Yalnız bombardir olaraq "Karvan"a çempionluq sevinci yaşatmaq istəyirəm. Amma ən əsası mövsümü ilk sırada bitirməkdir. Bombardir olmaq elə də çox önəmli deyil".
Təcrübəli oyunçu Premyer Liqada komanda sayının artırılmasının tərəfdarı olduğunu diqqətə çatdırıb:
"Hamı bilir ki, 10 komanda çox azdır. 12 və ya 14 olsa, çox yaxşı olar. Çempionatın səviyyəsi qalxar, bölgələrdə inkişaf olar. Sayın artmasının uşaq futboluna da üstünlük verər. Hazırda I Liqada elə uşaqlar var ki, Premyer Liqadakı çoxundan yaxşıdır. Sadəcə, məşqçilərin inamsızlığı var, güvənmirlər. I Liqaya yuxarıdan aşağı baxırlar, oradan oyunçu çağırmırlar".
O, "Karvan"da baş məşqçi Kənan Kərimovun da əziyyətinin çox olduğunu bildirib: "Ona güvənirik. İnanırıq".
