Report.az
Azərbaycan Basketbol Liqasının XI turunda hakim idarəçiliyi ilə bağlı etiraz edən klublar müəyyənləşib.
Bu barədə "Report"a Hakimlər Komitəsinin sədri Ələkbər Həsənov məlumat verib.
O, "Sabah", "Neftçi", "Sumqayıt" və "Naxçıvan"ın qərarlarla bağlı Azərbaycan Basketbol Federasiyasına müraciət etdiyini bildirib:
"Klubların hər birinin fərqli narazılıqları var. Hamısı eyni şeyi demir. Biri basketbolçunun meydandan haqsız qovulduğunu söyləyir. Digəri hansısa epizodda səhv qərar verildiyini vurğulayır. Bu cür məsələlər idi. Həmin matçlar yenidən izlənildi. Hamısı ilə bağlı qərarın düzgün olduğu üzə çıxdı. Hər qarşılaşmada hansısa xırda səhvlər ola bilər. Amma onların müraciət etdikləri epizodlarda qərarlar düzgündür. Məsələn, "Sabah"ın baş məşqçisi Rimas Kurtinaytisə iki texniki cərimə verilib. "Naxçıvan" və "Neftçi" komandaları arasında görüşdəki münaqişə ilə bağlı qərarların da hamısı düzgündür".
Hakimlər Komitəsinin sədri ötən həftə çempionatda 9 görüşün baş tutduğunu xatırladıb:
"Təxirə salınmış oyunlar da var idi. Bizim 11 hakimimiz var. Ele referi var ki, dörd gün ardıcıl hakimlik edir. Bu da performansa təsir göstərir. Buna baxmayaraq, matçlarda ciddi səhvlər olmayıb".
Qeyd edək ki, Azərbaycan Basketbol Federasiyası ötən gün klubların etirazları ilə bağlı açıqlama yayıb.
