Sport24.az
"Çoxları II liqanı Əsəsnaməyə uyğun olaraq yarımpeşəkar adlandırır. Mən isə belə düşünmürəm. Bu il turnirdə iştirak edən komandalar son tura kimi mübarizə apardı. Həmçinin PFL-in müvafiq göstəriş və tələblərini yerinə yetirdi. Fikrimcə, ilk mövsümdə II Liqa peşəkarlığıyla diqqət çəkdi. Özümüz də ilk dəfə idi ki, peşəkar liqada çıxış edirdik. Debüt etməyimizə baxmayaraq, çıxışımızı qənaətbəxş hesab edirəm". Bu sözləri Sport24.az-a açıqlamasında II Liqada çıxış edən "Füzuli"nin icraçı direktoru Vasif İsmayılov deyib.
İsmayılov komandanın azarkeşlərini də yaddan çıxartmayıb: "Ən azı 2-ci pilləyə iddialı idik və yalnız sonuncu turda şansımızı əldən verdik. Və yekunda çempionatı 4-cü pillədə başa vurduq. Təbii ki, deyəcəklərim son turda məğlub olmağımıza əsas vermir, amma müəyyən qədər təsiri var. Belə ki, bir neçə əsas heyət oyunçumuz cəza və zədəyə görə meydana çıxa bilmədi. Bütün çətinliklərə baxmayaraq, debütant olaraq mövsmü ilk "4-lük"də tamamlamağımızı pis nəticə hesab etmirəm. Hətta son oyunumuzda bizə dəstək verən azarkeşləri yaddan çıxarmadıq. Meydana "nəticədən asılı olmayaraq, bizə daim dəstəyiniz üçün təşəkkür edirik" baneri ilə çıxmışdıq. II Liqada iştirak etməklə, başda özüm olmaqla, bütün "Füzuli" camiəsi böyüdü, peşəkarlaşdı".
II Liqa klubunun rəsmisi gələcək planları ilə bağlı da fikirlərini bölüşüb: "Hazırda komandaya yeni rəhbərlik gəlib. Hələlik müqaviləsi bitən oyunçuları yola salmaqla məşğuluq. Bundan başqa AFFA İcraiyyə Komitəsinin I və II Liqada komanda sayının artıracağıyla bağlı qərarı gözləyirik. Bizə I Liqada oynamaq üçün lisenziya verilib. Qalıb bircə klub sayının artması.İcraiyyə Komitəsinin verəcəyi qərardan sonra gələcək mövsümlə bağlı planlarımızı quracağıq".
ABDULLA İSMAYILOĞLU
