Sport24.az
RƏŞAD
Neçə vaxtdı ölkənin əsas komandası üçün baş məşqçi axtarışına çıxmışıq. Hər gün mətbuatda bir mütəxəssisn adı yazılır, hər dəfə həmin məşqçinin müsbət və mənfi tərəflərini müzakirə edir, onun yığma komandamıza nə verəcəyini təhlil edirik. Sanki yeni gələn mütəxəssis "ağ atlı oğlan"dı, Bakıya qədəm basan kimi futbolumuzun bütün problemləri həll olunacaq, yığma komanda qələbələri sıralayacaq, müdafiəçilərimiz rəqib hücumçularına göz açmağa imkan verməyəcək, hücumçularımız isə rəqib qapısını aşsüzənə döndərəcək.
Doğrudanmı siz elə düşünürsüz? Elə fikirdəsizsə, səhvsiz. Otuz iki ildi deyirik, yazırıq, bu gün də təkrarlamağa məcburuq. Azərbaycan futbolunun, daha doğrusu, yığmasının problemi baş məşqçi deyil! Azərbaycanda kadr, daha dəqiq desəm, futbolçu problemi var. Özü də bu tək A millisi ilə bağlı deyil. Bütün yaş qrupları üzrə yığma komandalarımızda eyni problem yaşanır.
Neçə vaxtdı futboldan, millidən söz düşəndə yerli mütəxəssislər sanki, sözləşiblərmiş kimi ölkənin əsas komandasına yerli məşqçinin rəhbərlik etməsinin vacibliyini qeyd edir, mentallıq, milli ruh barədə gəlişi gözəl sözlər səsləndirirlər. Hamı danışır. Ancaq real durumu nəzərə alan yoxdu.
Dünən Azərbaycan futbolunda daha bir "qara cümə" yaşandı. Əsas milli Albaniyaya, Samir Əliyevin rəhbərlik etdiyi U-21 Slovakiyaya, Elxan Abdullayevin U-19-u isə Türkiyəyə böyük hesabla məğlub oldu. Bu da sizə yerli məşqçilər... Bunlar yeniyetmə və gənclər millisində özlərini doğrulda, ortaya iş qoya bilmirlərsə, sabah A millisinə gəlsələr nə edəcəklər?
Odur ki, yenə deyirəm, bizim problemimiz əcnəbi məşqçi ilə bağlı deyil. Çatışmazlığı ümumi futbol sistemində axtarmaq lazımdı. Nə qədər ki, bu sistemdə dəyişiklik olmayacaq, məşqçilər müasir futbolun tələblərinə uyğun işlərini qurmayacaqlar inkişafdan, irəli getməkdən danışa bilməyəcəyik. Sistem, işə yanaşma dəyişməlidi, cənablar...
AFFA prezidenti postunda dəyişiklik etməklə inkişaf olmur. Qurban Qurbanov demişkən, toplananların yerini dəyişəndə cəm dəyişmir...
