Idman.biz
Futbol İnkişaf Fondu ölkə futbolunun dirçəlməsi üçün bir çox kreativ işlər görür.
İdman.biz xəbər verir ki, qurumun icraçı direktoru Tural Piriyev Sport1.az-a açıqlamasında maliyyə dayağı olmayan klublara sponsor axtarışında olduqlarını deyib.
O, Premyer Liqa və I Liqaya yüksələn, II Liqaya yeni gələn komandalara dəstək göstərməli olduqlarını bildirib: "Hazırda AFFA ilə birgəİnkişaf Strategiyasına uyğun olaraq, klubların yeni gəlir kanallarının formalaşdırılması, fəaliyyət gəlirlərinin artırılması, sponsorların cəlb olunması ilə bağlı planlar üzərində işləyirik. Təbii ki, burada sadəcə gəlir kanallarının formalaşdırılması yox, həmçinin bu işlərin görülməsi üçün klubların strukturlarının təkmilləşdirilməsi də önəmlidir. Bununla bağlı da planlarımız var. Hazırda I və II Liqada olan region klubları ilə individual əməkdaşlıqlarımız davam edir. Bəziləri ilə bağlı artıq müəyyən işlərimiz var. Premyer Liqa və I Liqaya yüksələn, II Liqaya yeni gələn komandalara dəstək göstərməli olduğumuzu düşünürük".
Tural bəy "Zaqatala" və "Şamaxı"ya sponsor axtardıqlarını da bildirib: "12.02.2024-cü il tarixində "Zaqatala" ilə "Music Gallery" arasında baş sponsorluq müqaviləsi imzalanmışdı. Uzun müddətli planlar var idi. Lakin şirkət əl dəyişdirdiyi üçün bu mövsümün sonu sponsorluq anlaşması bitdi. Hazırda "Zaqatala"da Biznes Klub layihəsi çərçivəsində üzvlərin sayını artırmağa çalışırıq. Bununla yanaşı təbii ki, sponsorların cəlb olunması da nəzərdə tutulub. Fəaliyyət planımıza sadəcə "Zaqatala"ya sponsor cəlb olunması deyil, həmçinin Premyer Liqada yeganə sponsorsuz klub "Şamaxı" da daxildir. Əlbəttə ki, yalnız bu 2 prioritetlə qalmayacağıq. Yenə də hansısa regionda sponsor cəlb olunması ilə bağlı imkanlar olarsa, onları dəyərləndirməyə çalışacağıq. Bununla yanaşı, klubların əlavə gəlirlərinin formalaşması, gəlir diversifikasiyası yaradılması üçün də işlərimiz davam edəcək".
İdman.biz
