Sport24.az
FİFA UEFA və KONKAKAF-ın sərt tənqidlərinə cavab verib. Sport24.az xəbər verir ki, qurum yaydığı rəsmi bəyanatda FIFA Forward Enterprise (FFE) layihəsinin futbolu satmaq və ya idarəçiliyi özəl investorlara təhvil vermək məqsədi daşımadığını bildirib.
FİFA prezidenti Canni İnfantinonun rəhbərlik etdiyi təşkilat bəyan edib ki, mediada yayılan yanlış məlumatlar məsləhətləşmə prosesinə mənfi təsir göstərib. Qurum vurğulayıb ki, bütün 211 üzv assosiasiyaya layihəni nəzərdən keçirmək və onunla bağlı qərar vermək imkanı yaradılacaq.
FİFA həmçinin qeyd edib ki, FFE layihəsinin əsas məqsədi turnirlərin kommersiya idarəçiliyini təkmilləşdirərək gəlirləri artırmaq və əldə olunan vəsaiti 211 milli federasiya arasında bölüşdürməkdir. Təşkilat iddia edib ki, layihə yalnız üzv federasiyaların əksəriyyətinin dəstəyi ilə həyata keçiriləcək.
Bəyanatda 2027-2030-cu illəri əhatə edən FIFA Forward proqramı çərçivəsində hər federasiyaya 20 milyon ABŞ dolları ayrılacağı, əlavə 20 milyon dollarlıq Fast Forward proqramının könüllü xarakter daşıdığı və kənar investisiyalar hesabına maliyyələşdiriləcəyi açıqlanıb.
FİFA vurğulayıb ki, bütün idman qərarları, qaydalar və proqramlar üzərində tam nəzarət yenə də qurumun əlində qalacaq.
Qeyd edək ki, FİFA-nın kommersiya hüquqlarının 20-30 faizinin özəl investisiya fondlarına satılması ilə bağlı ilkin təşəbbüsü UEFA və KONKAKAF tərəfindən kəskin etirazla qarşılanıb. UEFA-ya üzv 55 federasiya layihənin həyata keçiriləcəyi təqdirdə milli komandalarını FİFA turnirlərindən çəkməklə hədələyib. KONKAKAF da ayrıca bəyanat yayaraq təşəbbüsü rədd etdiyini açıqlayıb.
