Sport24.az
Türkiyənin "Bandırmaspor" klubuna ötən ay tətbiq olunan transfer qadağasının səbəbi məlum olub. Sport24.az bu barədə etibarlı mənbədən məlumat əldə edib.
FIFA-nın bu il fevralın 3-də verdiyi qərara əsasən, Türkiyə təmsilçisi azərbaycanlı futbolçu Coşqun Diniyevə 25 min avro borclu çıxıb.
Mübahisə tərəflər arasında 10 fevral 2025-ci ildə imzalanmış qarşılıqlı xitam sazişindən qaynaqlanıb. Həmin sənədə əsasən, "Bandırmaspor" futbolçuya 25 min avro kompensasiya ödəməyi öhdəsinə götürsə də, müəyyən edilmiş müddətdə bunu etməyib.
Coşqun Diniyev əvvəlcə kluba rəsmi xəbərdarlıq göndərərək borcun ödənilməsini tələb edib. Nəticə əldə olunmadığından məsələ FIFA-ya daşınıb.
Türkiyə klubu müdafiəsində ödənişin həyata keçirildiyini bildirsə də, bunu təsdiqləyən heç bir sənəd təqdim edə bilməyib. FIFA da futbolçunun mövqeyini haqlı sayaraq "Bandırmaspor"un Diniyevə 25 min avro və həmin məbləğə hesablanan faiz ödəməsi barədə qərar çıxarıb.
Bundan əlavə, qurum klubu təkrar maliyyə pozuntusuna görə 5 min ABŞ dolları məbləğində cərimələyib. FIFA qərarında açıq şəkildə qeyd olunub ki, borc 45 gün ərzində ödənilmədiyi halda klub yeni futbolçu qeydiyyatından məhrum ediləcək.
Maraqlıdır ki, qərardan təxminən üç ay sonra – may ayında "Bandırmaspor"a transfer qadağası tətbiq olunub. Bu isə klubun FIFA-nın qərarını vaxtında icra etmədiyi ehtimalını gücləndirir.
Beləliklə, "Bandırmaspor"un aldığı transfer qadağasının arxasında azərbaycanlı futbolçu Coşqun Diniyevlə bağlı maliyyə mübahisəsinin dayandığı ortaya çıxıb.
