Sport24.az
"Qarşıdakı günlərdə "transfer bazarı"nda canlanma hiss olunacaq. Heç şübhəsiz ki, ilk olaraq avrokuboklara yollanan komandalar heyətlərinə yeni futbolçular cəlb edəcəklər. Onlar bu arada digər elita klubları ilə müqayisədə daha fəal olacaqlar". Bu sözləri Sport24.az-a açıqlamasında Erkin İbrahimov deyib.
Tanınmış agent transfer dönəmindəki gözləntilərini də dilə gətirib: "Səmimi deyim ki, əsas gözləntim "Turan Tovuz"dandı. Çünki kluba yeni, təcrübəli əcnəbi baş məşqçi gəlib. Kurban Berdıyevin çempionatımıza hansı futbolçuları dəvət edəcəyi çox maraqlıdı. Düşünürəm ki, Ayxan müəllimin çalışdırdığı "Şamaxı" da yeni transferlərlə Premyer Liqaya rəng qatacaq. Hələki "Neftçi" və "Kəpəz"də durğunluqdu. Bunların birində baş məşqçi, digərində isə büdcə məsələsi aydınlaşandan sonra transfer çalışmalarına start veriləcək".
Qeyd edək ki, Azərbaycan Premyer liqasında "transfer pəncərəsi" iyunun 25-dən, sentyabrın 16-dək açıq olacaq.
