Report.az
"Çelsi"nin baş məşqçisi Liam Rosenyor argentinalı yarımmüdafiəçi Entso Fernandesin intizam qaydalarını pozduğuna görə növbəti iki oyun üçün heyətdən kənarlaşdırıldığını açıqlayıb.
"Report"un "Football London"a istinadən məlumatına görə, buna futbolçunun İspaniyanın "Real" komandasına mümkün keçidi ilə bağlı verdiyi açıqlamalar səbəb olub.
Baş məşqçi 25 yaşlı futbolçunun klubun qərarına əsasən, sabah İngiltərə Kubokunun 1/4 finalında "Port Veyl"lə, aprelin 12-də isə Premyer Liqada "Mançester Siti"yə qarşı keçiriləcək oyunları buraxacağını bildirib. O, həmçinin Fernandesin klub mədəniyyətini və formalaşdırmaq istədikləri sistemi müəyyən edən sərhədi keçdiyini söyləyib.
Qeyd edək ki, 2022-ci ildə Argentina millisinin heyətində dünya çempionu olan Entso Fernandes cari mövsümdə "zadəganlar"ın heyətində keçirdiyi 46 matçda 12 qol vurub və 6 məhsuldar ötürmə edib. O, 2023-cü ilin yanvarından London klubunda çıxış edir.
