Sport24.az
"Əzmkar və layiqli qələbə qazandıq. Uşaqlar meydanda sona qədər mübarizə apardı. Cavab matçına yaxşı əhval-ruhiyədə çıxacağıq. Amma bu o demək deyil ki, cütün taleyi həll olunub. Bizi qarşıda daha ağır 2-ci oyun gözləyir gözləyir". Bu sözləri Sport24.az-a açıqlamasında Elvin Məmmədov deyib.
Təcrübəli futbolçu gələn mövsümdən "Cəbrayıl"da oynamayacağını da bildirib: "Bura Cavid müəllimin israrlı xahişindən sonra gəldim. Yaşım və fiziki hazırlığım artıq 90 dəqiqə oynamağa imkan vermir. Ən yaxşı halda bir hissə meydanda ola bilərəm. Ona görə də artıq məşqçiliyə başlamağın vaxtıdı. Butslarımı birdəfəlik mismardan asmağı düşünürəm".
Yığmanın sabiq üzvü Ayxan Abbasovun "Turan Tovuz"dan gözlənilməz ayrılığına da münasibət bildirib: "Ayxan müəllim olduqca savadlı və nəticə verən mütəxəssisdi. Onun Tovuz klubundan ayrılması mənim üçün gözlənilməz oldu. Amma nə etmək olar, bu futbolun reallığıdı. Həm Ayxan müəllimə, həm də "Turan Tovuz"a bundan sonra uğurlar arzu edirəm".
Qeyd edək ki, I Liqaya vəsiqə uğrunda pley-offun ilk görüşündə "Cəbrayıl" "Araz Saatlı"nı 2:0 hesabı ilə məğlub edib.
