Sport24.az
"Öz istəyimlə komandadan ayrıldım. Getməyin vaxtı idi". Bu sözləri Sport24.az açıqlamasında "Kür Araz"ın artıq sabiq baş məşqçisi Ələmdar Mustafayev deyib.
Mustafayev klub rəhbərliyi ilə fikirlərinin üst-üstə düşməməsi səbəbindən postundan ayrıldığını vurğulayıb: "Səmimi deyim ki, çalışdığım yerdə peşəkarlığın inkişafına təkan verməyə çalışmışam. Amma "Kür Araz"da tək baş məşqçi yox, başqa işlərdə görürdüm. Məşqçi korpusu yox, inventarda çatışmazlıq çox idi, oyunçuların maaş problemi olurdu, həmçinin ürəyim istədiyi kimi məşqlər keçə bilmirdim. Məcbur olub, bir çox işləri də üzərimə götürürdüm. Bundan başqa klub rəhbərliyi ilə mənim futbola baxışım daban-daban ziddi idi. Ona görə belə davam edə bilməyəcəyimi anlayıb istefa vermək qərarına gəldim və düz etdiyimi düşünürəm".
Ələmdar bəy dünən baş tutan Albaniya - Azərbaycan görüşündə oğlu Bəhlul Mustafazadənin çıxışına da toxunub: "Oyuna sona kimi baxdım. Təbii ki, komandanın içində deyilik, hər şey baş məşqçi daha yaxşı biilir. Amma ilk yarıda millimizdə dinamiklik aşağı idi. Fasilədən sonra daha fəal idilər, əsas da hücuma qoşulmaqda. Bəhlula gəlincə, nə yaxşı, nə də pis oynadı. O, bu dəfə hücumlara qoşulmaqda elə də aktiv olmadı. Qapımızda vurulan hər 3 qol müdafiədəki səhvlərdən vuruldu. Hesab edirəm ki, arxa xətdə boşluqlar çox oldu və rəqib də bundan istifadə etdi".
ABDULLA İSMAYILOĞLU
