İdman.biz
"Fernandu Santuşun təcrübəli məşqçidir".
Bunu İdman.bizə Azərbaycan millisinin sabiq futbolçusu Ceyhun Sultanov deyib.
O, portuqaliyalı təcrübəli mütəxəssis Fernandu Santuşun yığmaya baş məşqçi gətirilməsinə münasibət bildirib. Sultanov bildirib ki, milliyə daha gənc mütəxəssisin təyin olunmasının tərəfdarı olub: "Santuş sıradan bir məşqçi deyil. Amma millimizə gənc mütəxəssis daha uyğun olardı. Çünki dinamikliyi ilə fərqlənirlər. İş çoxdur. Futbolun inkişafını daha dinamik, gənc birinə tapşırılmalıydı. Zamana ehtiyac var".
Sultanov Fernandunun qarşısına qoyulan AVRO-2028-in seçmə mərhələsində uğurlu çıxış vəzifəsinin öhdəsindən gələcəyinə inanmadığını deyib: "Futbolda hər şey ola bilər. İndiki dönəmdə millimizdə qrupdan çıxacaq potensial yoxdur. Daha da güclənməlidir. AVRO-2028-ə 4 il var. Amma daha çox zaman lazım olacaq. Düzdür, indiki futbolçularla oynaya bilərsən, amma qrupdan çıxmaq real deyil. Çox danışmaq, İndidən neqativə yüklənmək istəmirəm. Amma görünən odur ki, Santuş özü bilir ki, bunu etmək mümkün deyil. Milli komandamızı yaxşı tanıyır. Bizə 4:0, 5:0 hesabı ilə qalib gələndə potensialımıza yaxşı bələd olub. Bu, Portuqaliya deyil. Gələnlərin hər biri ilk olaraq qrupdan çıxacağıq sözünü verir, yaxşı oynayacaqlarını deyir. Zaman göstərir ki, alınmayanda futbolçunun keyfiyyətinin çatmadığı bəhanəsini gətirirlər. Ona görə də zamana ehtiyacımız var. Amma fikrimcə, bu alınmayacaq".
Qeyd edək ki, Santuşla 3+1 illik müqavilə imzalanıb.
Emin Ağa
İdman.biz
