Sport24.az
"Əvvəlcədən ağır matç olacağını bilirdik. Buna baxmayaraq, qələbəyə köklənmişdik. Çoxsaylı qol imkanlarımız olsa da, yalnız birində son nöqtəni qoya bildik. Fikrimcə, layiqli və vacib qələbə qazandıq". Bu sözləri Sport24.az-a açıqlamasında "Zirə"nin futbolçusu Ceyhun Nuriyev deyib.
"Kəpəz"lə oyun barədə fikirlərini bölüşən 23 yaşlı müdafiəçi mübahisə doğuran qolla bağlı fikirlərini bölüşməklə yanaşı, qarşısdakı son turu da dəyərləndirib: "Bəziləri deyir ki, Salifu Suma qol vurarkən əllə oynayıb. Açığı deyim ki, epizoda diqqətlə baxmamışam. Hər halda VAR var. Qayda pozuntusu olsaydı, müdaxilə gələrdi. Əsas rəqiblərimizdən "Sumqayıt" xal itirdi. Buna rəğmən "kimyaçılar" hələ də şanslarını qoruyur. Qarşıdakı son turda "Sabah" - "Neftçi" qarşıdurması da var. 36-cı tur bütün avrokubok iddialıların üçün final oyunu olacaq. 3-cü pilləni qorumaqla qitəmiqyaslı yarışlaşa gedə bilərik. Amma məqsədimiz 2-ci olmaaqdı. "Səbail" ilə oyunda da meydana yalnız qələbə üçün çıxacağıq".
Futbolçu gələcək karyerasına da toxunub: "Sabah"la müqayisədə "qartallar"ın heyətində daha çox şans qazanıram. Rəşad müəllim sağ olsun, mənə güvənib start heyətində şans verməsi isə əlavə motivasiyadı. Bunun qarşılığı olaraq maksimum çalışıram ki, meydanda əlimdən gələnin ən yaxşısını edim. "Zirə" ilə ikiillik müqaviləm var. Bu klubda hər şey məni qane edir".
ABDULLA İSMAYILOĞLU
