Sport24.az
"Səbail" Misli Premyer Liqasının 20-ci turunda doğma meydanda "Kəpəz"i 1:0 hesabı ilə məğlub edib. Sport24.az xəbər verir ki, "dənizçilər"in baş məşqçisi Cavid Hüseynov matçdan sonra keçirilən mətbuat konfransında jurnalistlərin suallarını cavablandırıb:
- Aşağı pillələrdə çox gərgin mübarizə gedir. Buna görə də psixoloji cəhətdən əlavə hazırlaşmaq lazım idi. Komanda olaraq buna yaxşı hazırlaşmışdıq. Futbolçularımı təbrik edirəm. Əsl mübarizə, xarakter göstərdilər. İki fərqli hissə izlədik. Bu da normaldır. İlk yarıda bir neçə qol epizodumuz oldu. İkinci hissədə məlum idi ki, rəqib irəli atılacaq. Əks-hücumlarımız oldu. Sonda nəticə bizim xeyrimizə olduğu üçün sevinirik. Amma oyun planında üzərində işləməli olduğumuz çox şey var.
-Qış fasiləsindən sonra komandadakı yüksəlişi nə ilə əlaqələndirmək olar?
- Mən "Səbail"ə gələndə qış fasiləsinə 5 tur qalmışdı. 5 oyundan 3-ü turnir cədvəlinin ilk pillələrində olan rəqiblərə qarşı oldu. Taktiki baxımdan hazırlaşmaq üçün vaxtımız yox idi. Qış fasiləsində vaxtdan səmərəli istifadə etdik. Futbolçularda taktiki baxımdan xeyli inkişaf görürük. Bu nəticələri gözləyirdik.
- Yeni transferlər olacaq?
- Güclənmək yönündə işlər aparılır. İki futbolçu istəmişəm. Rəhbərlik bunu yerinə yetirmək üçün çalışır.
- Hansı mövqeyə futbolçu istəmisiz?
- Hücum xəttini də, müdafiəni də gücləndirmək istəyirik. Rəqabəti hiss etmək üçün bir mövqedə iki oyunçumuz olmalıdır.
