Sport24.az
"Bu mövsüm çempionluq şansımızı itirmişdik. Amma ikinci olmaq şansımız qalırdı və bundan maksimum istifadə etdik". Bu sözləri Sport24.az-aaçıqlamasında "Cəbrayıl"ın baş məşqçisi Cavid Hüseynov deyib.
Gənc mütəxəssis komandasının "gümüş" qazanmasına baxmayaraq, nəticədən razı qalmadığını bildirib: "Mən hər işdə maksimum nəticəyə köklənirəm. Ona görə də ikinci olmağımızı böyük uğur saymıram. Amma iki fərqli dövrə keçirməyimizi, futbolçu qıtlığı və digər bu kimi çatışmazlıqları nəzərə alsaq, 2-ci pillədə qərarlaşmağımız bəlkə də qənaətbəxşdi. Çempion ola bilməməyimiz də öz günahımızdı. Vacib oyunlarda qızıldan qiymətli xallar itirdik. Qısası, "Baku Sportinq"ə çempionluğu əlimizlə verdik".
Hüseynov artıq geridə qalan oyunları unudub qarşıdakı pley-off matçlarına fokuslandıqlarını da bildirib: "II liqada çempionat bitsə də, bizi daha 2 gərgin qarşılaşma gözləyir. "Difai Ağsu" ilə görüşlərdə maksimum gücümüzü ortaya qoyacağıq ki, sonda I Liqaya yüksələk".
Qeyd edək ki, "Cəbrayıl"la "Difai Ağsu" arasında baş tutacaq ilk pley-off oyunu mayın 28-də keçiriləcək. Cavab qarşılaşması isə iyunun 4-nə təyin olunub.
ABDULLA İSMAYILOĞLU
