Idman.biz
Türkiyə Superliqasının 26-cı həftəsində "Beşiktaş" səfərdə "Gənclərbirliyi"nin qonağı olub. Qarşılaşma qonaqların 2:0 hesablı qələbəsi ilə başa çatıb.
İdman.Biz xəbər verir ki, meydan sahibləri oyunun hələ ilk dəqiqələrində çətin vəziyyətə düşüblər. Matçın 15-ci dəqiqəsində Koita Djaloya qarşı kobudluğuna görə VAR müdaxiləsindən sonra qırmızı vərəqə alaraq meydandan qovulub.
Say üstünlüyü qazanan "Beşiktaş" ikinci hissədə təzyiqi artırıb. 56-cı dəqiqədə Olaitan qapıçıdan dönən topu tamamlayaraq hesabı açıb. 66-cı dəqiqədə isə səhnəyə Orkun Kökçü çıxıb. O, sol cinahdan, demək olar ki, sıfır nöqtəsindən yerinə yetirdiyi cərimə zərbəsi ilə topu birbaşa tora göndərərək matçın taleyini həll edib.
Bu qalibiyyətdən sonra xallarının sayını 49-a çatdıran "Beşiktaş" turnir cədvəlində dördüncü pillədəki mövqeyini qoruyub. 25 xalı olan "Gənclərbirliyi" isə alt sıralardan uzaqlaşa bilməyib.
Qeyd edək ki, növbəti turda "Beşiktaş" öz meydanında "Kasımpaşa"nı qəbul edəcək. Ankara təmsilçisi isə səfərdə "Konyaspor"un qonağı olacaq.
Paralel keçən oyunda "Samsunspor" "Kayserispor"u qəbul edib. Qarşılaşma meydan sahiblərinin 2:1 hesablı qələbəsi ilə başa çatıb.
Bu nəticə ilə "Samsunspor" xallarını 35-ə çatdırarq turnir cədvəlində yeddinci sıraya yüksəlib. Qonaqlar isə autsayderlər qrupundadır.
19:24
Türkiyə Super Liqasının 26-cı həftəsində turnir cədvəlinin aşağı pillələrində qərarlaşan iki komanda - "Kasımpaşa" və "Eyüpspor" qarşı-qarşıya gəlib. Hər iki kollektiv üçün böyük əhəmiyyət kəsb edən matç meydan sahiblərinin 1:0 hesablı minimal qələbəsi ilə başa çatıb.
İdman.Biz xəbər verir ki, Emre Belözoğlu rəhbərlik etdiyi "Kasımpaşa"ya vacib üç xalı gətirən qolu 33-cü dəqiqədə Adria Benediçak vurub. Oyunun geri qalan hissəsində hesabı qorumağı bacaran İstanbul təmsilçisi üç oyunluq qələbə həsrətinə son qoyub.
Bu nəticədən sonra xallarını 24-ə çatdıran "Kasımpaşa" eniş zolağından çıxmağı bacarıb – 14-cü pillə. "Eyüpspor" isə 22 xalla təhlükəli zonada qalıb.
Qeyd edək ki, "Kasımpaşa" növbəti turda səfərdə "Beşiktaş"ın qonağı olacaq. Həmin qarşılaşmada sarı vərəqə limitini dolduran İrfan Can Kahveci komandasına kömək edə bilməyəcək. "Eyüpspor" isə doğma meydanda "Trabzonspor"u qəbul edəcək.
