Minifutbol üzrə dünya çempionatının 2025-ci ildə Bakıda keçirilməsi ilə bağlı təqdimat mərasimi təşkil olunub.
İdman.biz xəbər verir ki, tədbirdə gənclər və idman naziri Fərid Qayıbov, Azərbaycan Minifutbol Federasiyasının (AMF) prezidenti Orxan Məmmədov və Dünya Minifutbol Federasiyasının (DMF) prezidenti Filip Juda iştirak edib.
Tədbirin əvvəlində Dövlət Himnimiz səsləndirilib. Ardınca 1 il əvvəl Bakıda yüksək səviyyədə təşkil olunan ulu öndər Heydər Əliyevin xatirəsinə həsr olunan beynəlxalq turnirlə bağlı videoçarx nümayiş olunub.
2025-ci il minifutbol üzrə dünya çempionatının Bakıda keçirilməsi ilə əlaqədar Orxan Məmmədovla Filip Juda arasında anlaşma memorandumu imzalanıb.
Həmçinin dünya çempionatının təşkilatçılığı ilə bağlı Azərbaycan Minifutbol Federasiyası ilə Bakı Şəhər Halqası arasında da müqavilə imzalanıb. Azərbaycan milli komandasının forması Filip Judaya hədiyyə olunub.
İmzalanma mərasimindən sonra Azərbaycan haqqında xüsusi videoçarx nümayişi olub.
Emin Ağa
İdman.biz