Sport24.az
"Qələbədən başqa seçimimiz yox idi. Bütün riskləri nəzərə alaraq meydanda xarakter göstərib istədiyimizə nail olduq". Bu sözləri Sport24.az-a açıqlamasında "Şamaxı"nın futbolçusu Arsen Ağcabəyov deyib.
Müdafiəçi qarşıdakı son oyunla bağlı da fikirlərini bölüşüb: "Qaradağ Lökbatan" üzərində qələbəyə görə çox sevindik. Artıq son turun oyunu barədə düşünməli, həlledici qarşılaşmaya köklənməliyik. Gələn həftə "Araz Saatlı" ilə oyunumuz var. Onlar autsayder olsalar da, çox döyüşkən komandadı. Saatlı təmsilçisinin itirəcək heç nəyi qalmayıb. Bu onları daha da təhlükəli edir. Son görüşdə rəqib güclü "İmişli"ni yenməyi bacarıblar. Ehtiyatı əldən versək, biz də eyni aqibəti yaşayacağıq. Odur ki, "Araz Saatlı" ilə oyunumuz sıradan yox, çempionluq qarşılaşmasıdı. Əlimizdən gələnin ən yaxşısını edəcəyik ki, qalib gələk".
23 yaşlı futbolçu karyerasını "Şamaxı"da davam etdirmək fikrincə olduğunu da vurğulayıb: "Şamaxı" ilə daha 1 illik müqaviləm var. Allah nəsib etsə, qarşıdakı mövsümü Premyer Liqada "şirlər"in heyətində keçirmək və özümü daha da yaxşı tərəfdən göstərmək istəyirəm".
ABDULLA İSMAYILOĞLU
