Idman.biz
"Liverpul"un Baş məşqçisi Arne Slot, Premyer Liqanın 16-cı turunun "Brayton and Houv Albion" ilə oyunundan əvvəl komandasının hücumçusu Məhəmməd Salah haqqında danışıb.
İdman.Biz klubun rəsmi saytına istinadla xəbər verir ki, Slot Salahın klubda qalmasını istəmədiyi barədə söhbətləri təkzib edib.
"Onun qalmasını istəməmək üçün heç bir səbəbim yoxdur. Artıq eyni cavabı dəfələrlə verdiyim halda, bu sualı verməyin mənası yoxdur" – Slot deyib.
Slot, hücumçu Məhəmməd Salahın Çempionlar Liqasının altıncı turunun "İnter Milan"la (1-0) oyununda heyətdən kənarlaşdırılması qərarını kimin verdiyini də açıqlayıb.
"Biz klub olaraq qərar verdik və mən də bu qərarda iştirak etmişəm ki, onu "İnter"ə qarşı oyuna seçməməliyik. Mən həmişə rəhbərliklə əlaqə saxlayıram, amma heyət və ya oyun günü oynayacaq oyunçularla bağlı qərarlara gəldikdə, bu, həmişə mənim ixtiyarımdadır. Bu o demək deyil ki, idman direktoru Riçard Hyuzla danışmıram. Lakin oyunçunu meydana çıxarmaq və ya heyətə daxil etmək barədə son qərar tamamilə məndən asılıdır. Bu, həmişə elə belə də olub", - Slot bildirib.
Bir müddət əvvəl Məhəmməd Salah oyun vaxtının əsassız şəkildə azaldılmasından şikayətlənərək "Liverpul"u tənqid etmişdi. Nəticədə, hücumçu Çempionlar Liqasının 6-cı turunda "İnter Milan"la (1-0) oyunun heyətindən kənarlaşdırılıb.
