Idman.biz
Bu gün - 4 sentyabr Beynəlxalq Taekvondo Günü kimi qeyd olunur.
İdman.Biz xəbər verir ki, bu əlamətdar tarix taekvondonun dünyada təbliği, inkişafı və bu idman növünün əsas dəyərlərinin daha geniş tanıdılması baxımından xüsusi əhəmiyyət daşıyır.
Taekvondo yalnız fiziki hazırlıq və döyüş texnikaları ilə seçilən idman növü deyil. O, eyni zamanda intizam, hörmət, iradə, özünənəzarət və mənəvi güc kimi prinsipləri özündə birləşdirir. Məhz bu xüsusiyyətlər taekvondonu dünyanın ən populyar döyüş idman növlərindən birinə çevirib.
Azərbaycan taekvondosu beynəlxalq arenada bir sıra böyük uğurlara imza atıb. Xüsusilə Rio-2016 Yay Olimpiya Oyunları ölkə taekvondosu üçün tarixi nəticələrlə yadda qalıb. Radik İsayev +80 kq çəki dərəcəsində Olimpiya çempionu olub, Milad Beygi Hərçigani 80 kq-da, Patimat Abakarova isə 49 kq-da bürünc medal qazanıb.
Radik İsayev 2015-ci ildə dünya çempionu, 2014 və 2018-ci illərdə isə Avropa çempionu adını qazanıb. Milad Beygi Hərçigani isə 2017 və 2019-cu illərdə dünya çempionatının qalibi olub, həmçinin Bakı-2015 Birinci Avropa Oyunlarında və 2016-cı ildə Bakıda keçirilən Dünya Qran-Prisinin finalında qızıl medal əldə edib.
Bu göstəricilər həm də gənc nəslin taekvondoya marağının artırılması, sağlam həyat tərzinin və idman mədəniyyətinin təşviqi üçün mühüm fürsət hesab olunur.
